Манай улсын шүүх засаглал их сонин. Олон тэрбум, олон зуун сая төгрөгийн хахууль авсан, албан тушаалаа урвуулан ашиглаж улсад их хэмжээний хохирол учруулсан нөхдүүдийг цагдан хорих хилийн хориг тавиулах хуулийн байгууллагын хүсэлтийг хүлээж авахгүй. Оргон зайлах үндэслэл тогтоогдохгүй байна, эвий минь энэ хаачив гэсэн байдлаар толгойг нь илээд суллачихна.

Үүнийх нь ч гороор Ч.Сайханбилэг тэргүүтэй авлигачид хилийн дээс алхаад зугтаж алга болсон. Араас нь нэхэл дагал болох гэж улсын төсвөөс баахан мөнгө үрсээр л. 

Тэрбумаар хэмжигдэх хэмжээний хэрэгт нэр холбогдсон нөхдүүдийг ийн эвийлэх атлаа 20 мянган юанийн авлига авсан гэх Зам тээврийн хөгжлийн яамны Бодлого зохицуулалтын хэлтсийн даргаХ.Оргил-Эрдэнийг цагдан хорих үндэслэл тогтоогдохгүй байна гэснээ хилийн хориг тавьж энэ тэр. 

Сонсохоос ч инээдтэй. Монгол мөнгөөр найман сая төгрөгийн хахууль авсан хүн хилийн дээс алхаад хэд ч алхах юм билээ. Найман сая төгрөгийг бага гэж байгаа юм биш. Гэхдээ энэ инээдтэй шийдвэрийнхээ оронд хэргийн нотлох баримтыг устгах, үгсэн тохирохоос сэргийлж цагдан хорих шийдвэрийг гаргах учиртай байв, Монголын шүүхээс.

Шүүхийн шинэчлэл гэж Ерөнхийлөгчөөс эхлээд дээр дооргүй баахан шуугисан. Гэвч бодитой үр дүн гарсангүй, өнөөг хүртэл. Хэзээ шүүх байгууллага хараат бусаар, бие даасан байдлаар хэргийг үнэн зөвөөр дэнсэлж, хэрэгтнийг гэсгээдэг болох юм бүү мэд. 

АТГ, прокурор, цагдаа, шүүх гэсэн дөрвөн байгууллагын хооронд хэрэн хэссэн хэргүүд эхнээсээ хаагдаж, хэрэгсэхгүй болсоор л. Гэхдээ эдгээрийн олонх нь авлига, албан тушаалын хэрэг гэхээр шүүх засаглал энэ төрлийн гэмт хэргийг өөгшүүлэх сониролтой байна уу, эсвэл хуулийн байгууллага шалгаж, шийдвэрлүүлэх хүсэл сонирхолгүй байна уу.

Юутай ч, Монголын шүүх энэ мэт элгийн шийдвэрийг багахан шиг гаргаж, авлига, албан тушаалын гэмт хэрэг үйлдсэн этгээдүүдэд төрийн, шүүхийн төмөр нүүрийг харуулдаг цаг хурдхан ирээсэй гэж залбирнам. 

Г.Эрдэнэ