Монголбанкны ерөнхийлөгч асан Н.Золжаргалыг өнгөрсөн 2018 оноос авлига, албан тушаалын хэрэгт холбогдуулан Авлигатай тэмцэх газраас шалгаж эхэлсэн байдаг. Улмаар түүнд холбогдох хэрэгт нийслэлийн Прокурорын газраас яллах дүгнэлт үйлдэн Чингэлтэй дүүргийн Эрүүгийн хэргийн анхан шатны шүүхэд шилжүүлсэн билээ. Уг хэргийн урьдчилсан хэлэлцүүлгийг өнгөрсөн 2019 оны аравдугаар сарын 14-нд хийсэн бөгөөд гэм бурууг дэнслэх шүүх хурлыг 14 хоногийн дараа буюу 2019 оны аравдугаар сарын 28-ны 10.00 цагт дэнслэхээр товлосон юм. Гэвч шүүх хурал удаа дараа хойшлогдсоор өнөөдөр буюу энэ сарын 13-нд болох гэж байна.

Чингэлтэй дүүргийн Эрүүгийн хэргийн анхан шатны шүүхэд товлогдсон шүүх хуралд шүүгчээр Л.Галбадар, улсын яллагчаар Б.Мөнхбат, Ц.Сүхбат нар оролцох бол шүүгдэгч Н.Золжаргал өөрийн өмгөөлөгчийн хамт оролцох юм.

Хэргийг нэхэн сануулбал, төрсөн ах Н.Жаргалсайхан болон түүний хүү, охины нэрээр 2013-2016 онд Австри улс руу мөнгө шилжүүлж, уг гуйвуулсан 650 мянган ам.долларыг эхнэр нь хүлээн авч, тус улсад 110 гаруй ам метр талбайтай байр худалдан авч, үндэслэлгүй хөрөнгөжсөн хэрэгт буруутгаж буй.

Харин Н.Золжаргал энэ талаараа өөрийг нь Монголбанкны Ерөнхийлөгчийн ажлаа өгснөөс хойш шалгаж байгаа гээд 2015 онд Австрит байр худалдан авсан нь үнэн. Гэхдээ худалдаж авсан мөнгөө 2012 оноос өмнө буюу Монголбанкны ерөнхийлөгч болохоосоо өмнө хуримтлуулсан байсан гэдгийг онцолсон байдаг. 

Н.Золжаргалд холбогдох хэргийг шүүх бүрэлдэхүүн маш нууц байдалд хаалттай хэлэлцэнэ гэсэн мэдээлэл өмнө нь гарч байсан. Учир нь Монголбанкны ерөнхийлөгчөөр ажиллаж байхдаа маш нууц тушаал гарган, арилжааны банкуудад их хэмжээгээр мөнгө шилжүүлсэн нь уг хэргийг хаалттай хэлэлцэх үндэслэл болжээ. Энэ ч утгаараа өнөдөр болох шүүх хурал хаалттай болох юм байна.

Г.Эрдэнэ