Энэ сарын 10-ны өдөр Ховд аймгийн Алтай сумын Алтангадас багийн нутаг дэвсгэрт 51 настай эрэгтэй Н гэгч нь ТОЗ-8 маркын буугаар нэг тооны хулан агнасныг Ховд аймгийн Булган сум дахь сум дундын цагдаагийн хэлтэс иргэдийн мэдээллийн дагуу илрүүлжээ.

Хулан адуу нь Засгийн газрын 2012 оны долдугаар тогтоолоор батлагдсан ховор амьтны жагсаалтад багтсан амьтан юм. Уг жагсаалтад багтсан амьтдыг хууль бусаар агнавал Эрүүгийн хуулийн тусгай ангийн 24.5 дугаар зүйлийн 1-т “Улсын тусгай хамгаалалттай газар нутагт зөвшөөрөлгүйгээр амьтан агнасан, барьсан, эсхүл ховор амьтныг тусгай зөвшөөрөлгүйгээр агнасан, барьсан, зориудаар тэжээж гаршуулсан, үржүүлсэн, тэдгээрийн гаралтай түүхий эдийн зүйлийг хадгалсан, худалдсан, худалдан авсан, тээвэрлэсэн, гадаад улсад гаргасан, ховор амьтны чихмэл, эд, эрхтэн, тэдгээрийн гаралтай түүхий эдийн цуглуулга хийсэн бол таван мянга дөрвөн зуун нэгжээс хорин долоон мянган нэгжтэй тэнцэх хэмжээний төгрөгөөр торгох, эсхүл нэг жилээс таван жил хүртэл хугацаагаар зорчих эрхийг хязгаарлах, эсхүл нэг жилээс таван жил хүртэл хугацаагаар хорих ял шийтгэнэ” гэж заасан байдаг.

Түүнчлэн өнгөрөгч арванхоёрдугаар сарын 25-ны өдөр Баянзүрх дүүргийн V хорооны нутаг дэвсгэрт байрлах нэгэн караоке дотор иргэн Х-н гар утсыг үл таних хүн утсаар яриад өгье гэж хэлээд залилан авсан гэх хэргийг Баянзүрх дүүргийн цагдаагийн газрын нэгдүгээр хэлтсийн алба хаагчид илрүүлэн шалгаж байна.  Тиймээс иргэд та бүхэн таньж мэдэхгүй хүнд гар утсаа өгөхгүй байхыг цагдаагийн байгууллагаас сэрэмжлүүлж байна.