Дорноговь аймгийн Айраг сумын I багт оршин суудаг 45 настай иргэн М-ийн гар утас дэлбэрч, зүүн гарын бугалга тасарсан хэрэг гарчээ. Хэргийн цагдаагийн байгууллагаас шалгаж байгаа бөгөөд гэрчүүдийн мэдүүлснээр энэ сарын 13-нд буюу өчигдөр дээрх хэрэг болсон бөгөөд тухайн иргэн Самсунг маркийн гар утсаа зүүн талын энгэрийн халаасандаа хийсэн байж. Энэ үед гар утас нь дэлбэрч цээжин хэсэг бэртэл авч, зүүн гарын бугалга хэсэг тасарсан байна. Гэрчүүдийн мэдүүлснээр гар утасны батерэй хэт халж, үүний улмаас дэлбэрсэн байх гэж мэдүүлжээ.

Энэ талаар цагдаагийн байгууллагаас тодруулахад "Хэргийн газарт цагдаагийн алба хаагчид үзлэг хийж, эд мөрийн баримтыг биежүүлсэн байна. Хэргийг мөрдөн шалгаж байна. Мэргэжлийн байгууллагын дүгнэлт гараагүй учир ямар учраас дэлбэрснийг хэлэх боломжгүй" гэлээ.

Гэмтсэн иргэний хувьд Айраг сумын эмнэлэгт хэвтэн эмчлүүлж байгаа юм байна.

Г.Маргад