Мөнгө угаахтай тэмцэх, санхүүгийн хориг арга хэмжээ авах байгууллага ФАТФ-ын 2019 оны аравдугаар сарын 18-ны өдрийн хурлаар зарласан Мөнгө угаах, терроризмыг санхүүжүүлэхтэй тэмцэх стратегийн дутагдалтай улсын жагсаалтаас Монгол Улсыг гаргахын тулд холбогдох хууль тогтоомжид өөрчлөлт оруулж, мөнгө угаах гэмт хэрэгтэй тэмцэх тогтолцоог нэн даруй сайжруулах шаардлага үүссэн билээ. Энэ үүднээс Улсын Их Хурлын Хууль зүйн байнгын хорооны энэ сарын 16-ны өдрийн хуралдаанаар Мөнгө угаах терроризмыг санхүүжүүлэхтэй тэмцэх тухай хуульд нэмэлт, өөрчлөлт оруулах тухай хуулийн төслүүдийн анхны хэлэлцүүлгийг хийсэн юм. Тэгвэл яаралтай горимоор хэлэлцэж байгаа уг асуудалтай холбогдох хуулиас хоёр хуулийн төслийг чуулганаас дэмжээгүй байна. энэ талаар Сангийн дад сайд Х.Булгантуяагаас тодрууллаа.

-Саарал жагсаалтаас гарахад нэг алхам ухарчихлаа гэж та хэлсэн. Яаралтай горимоор зарим хуулийг хэлэлцүүлж байгаа. Нэг алхам ухарлаа гэдгээ тайлбарлахгүй юу. Хуулийн заалтууд унасан гэсэн  үг үү?

-Сангийн яамны цахим хуудаст албан ёсны мэдээлэл тавина. Өнөөдөр бол ажлын хэсгийнхэн өдөр тутамд хийдэг ажлаа танилцуулсан. Энэ хүрээнд яригдсан асуудал. Хуулийн зарим заалт хэт чанга байна гэдэг зүйл яригдсан. Энэ утгаараа өргөн барьсан хоёр хуулиас хоёр нь уначих шиг боллоо.

-Төсвийн орлогод ямар нэг өөрчлөлт орох уу?

-Тийм зүйл байхгүй. Зарим нэг зүйл заалтыг тодорхой болгож, олон улсын жишигт нийцүүлэх санал гаргасан.

Татвараас зугтах боломжийг нээгээд өгчихлөө гэж Х.Нямбаатар гишүүн ярьсан. Ийм боломжийг хаасан заалт унасан юм уу?

-Татвараас зугтах, гэмт хэрэг үйлдэх зэрэг хуулийн заалтыг чангаруулах ёстой гэдэг зөвлөмжийг олон улсын байгууллагаас өгсөн. Энэ хүрээнд Эрүүгийн хуульд өөрчлөлт оруулсныг ярьж байгаа байх.  

-Хуулиар ингэж чангаруулах шаардлага бий юү?

-Татвар огт төлдөггүй, зугтаадаг аж ахуйн нэгжүүдэд оногдуулах хариуцлагыг хуульчлах ёстой гэж Х.Нямбаатар гишүүн чуулганы хэлсэн. Түүнээс биш татвараа буруу зөрүү тайлагнасан бол Татварын тухай шинэчилсэн хуулиар залруулах боломжтой болсон шүү дээ.

Ташрамд дурдахад, яаралтай горимоор Мөнгө угаах терроризмыг санхүүжүүлэхтэй тэмцэх тухай хуульд нэмэлт, өөрчлөлт оруулах тухай, Нягтлан бодох бүртгэлийн тухай хуульд нэмэлт оруулах тухай, Санхүүгийн зохицуулах хорооны эрх зүйн байдлын тухай нэмэлт оруулах тухай, Эрүүгийн хуульд нэмэлт, өөрчлөлт оруулах тухай болон хамт өргөн мэдүүлсэн хуулийн төслүүдийг байнгын хороод, УИХ-ын чуулганаар хэлэлцүүлж байгаа юм.

Г.Маргад