Орос, Монголын зургаан байгууллага хамтарч 528 өрхийн эко хотхоныг бий болгож, цаашлаад бүх аймаг, сумын төвийг "Эко технопарк" хотхонтой болгохыг зорьсон төсөл хэрэгжүүлэх санаачилгыг гаргажээ. Энэ талаар "Эко эрин үндэсний төсөл”-ийн зохицуулагч Ц.Эрдэмт "Монгол Улсын хөгжлийн шинэ үзэл баримтлалыг боловсруулж, орон нутгийг хөгжүүлэх, Улаанбаатар хотын цэвэрлэх байгууламжийн асуудлыг шийдвэрлэх төсөл хэрэгжүүлэхээр төлөвлөөд байна. Төслийн хүрээнд Монгол Улсын хүн амын амьжиргааны түвшнийг богино хугацаанд дээшлүүлж, хөгжлийг шинэ шатанд гаргаж, иргэдийг аз жаргалын индексээрээ дэлхийд тэргүүлэх бололцоо бий. Эхний ээлжин сумын төвүүдэд ийм хотхон баригдсанаар ажлын байр ч бий болж, Улаанбаатар дахь төвлөрөл буурна. 

Ирэх тавдугаар сард хотхоны барилгын ажлыг эхлэхээр бэлтгэж байна.

Газрын асуудал шийдэгдвэл нэг жилийн дотор 528 өрхийн хоёр хотхон барих боломжтой. Эхний хоёр хотхон амжилттай баригдвал 10 жилийн дотор төсөл бүрэн хэрэгжинэ. Ингэснээр Монгол Улс дэлхийн анхны ногоон хөгжлийн загвар улс болох бүрэн боломжтой. Цэвэрлэх байгууламжийн асуудлыг төслийн хүрээнд шийдэх бөгөөд ингэснээр Улаанбаатар хотын цэвэрлэх байгууламжийг бүрмөсөн байхгүй болгож, лагийг шууд боловсруулан хар шороо болгох шинэ үйлдвэр барина" гэлээ.

Төсөл санаачлагчдын төлөвлөгөөгөөр лагийн бохирыг экспортод гаргаж болохуйц супер эко хар шороо болгон хувиргах юм байна. Уг технологи нь ОХУ-ын 50 шилдэг үндэсний төслийн нэгээр шалгарч байсныг энэ удаагийн хэвлэлийн хурлаар мөн онцолсон юм. 

Дээрх төсөл эхний шатандаа үргэлжилж байгаа боловч олон улсын хөрөнгө оруулагчид ихээр сонирхож байгааг төслийнхөн онцлоод Вьетнам, Итали, Испани, Австрали улсын хөрөнгө оруулагчид хамтарч ажиллахаар хөрөнгөө оруулсан гэлээ.