Нийслэлийн Эрүүгийн хэргийн давж заалдах шатны шүүхийн 2020 оны нэгдүгээр сарын 21-ний шүүх хуралдаанаар Э.Бат-Үүлд холбогдох Зөрчлийн хэргийг зөрчилд холбогдогч Э.Бат-Үүлийн өмгөөлөгч Б.Мэргэний гаргасан давж заалдах гомдлын дагуу хянан хэлэлцлээ. 

Э.Бат-Үүл нь 2019 оны долдугаар сарын 20-ны өдөр өөрийн "Эрдэнийн Бат-Үүл" нэртэй твиттер хуудсанд “Ерөнхийлөгчийн тамгын газрын дарга З.Энхболд яаж зуудгаа харуулан М.Энхсайханыг цагдан хорьж байгаа юм байна! Улаам цайм ямар ч хуулийн үндэслэлгүйгээр хүнийг цагдан хорьж болдгийг Энхсайханаар зориуд харуулжээ!

З.Энхболд айлгана гэж бодоод байгаа юм байхдаа? Хуцлаа л байна!” гэх сэтгэгдэл оруулсан юм. Уг үйлдлийг нь бусдын нэр хүндэд халдаж, гүтгэсэн хэргээр Ерөнхийлөгчийн Тамгын газрын дарга З.Энхболд гомдол гаргасны дагуу цагдаагийн байгууллагаас шалгаж, нэр төр, ажил хэргийн алдар хүндэд халдаж, гутаан доромжилсон, худал мэдээллийг нийтэд тараасан зөрчлөөр хоёр сая төгрөгөөр торгосон юм. Уг торгуулийг хотын дарга асан Э.Бат-Үүл эсэргүүцэж, Нийслэлийн Эрүүгийн хэргийн давж заалдах шатны шүүх хандсан юм. 

Сүхбаатар дүүргийн Эрүүгийн хэргийн анхан шатны шүүхээс: Зөрчлийн тухай хуулийн 6.21 дүгээр зүйлийн 1 дэх хэсэгт зааснаар зөрчилд холбогдогч Эрдэнийн Бат-Үүлийг 2,000,000 төгрөгөөр торгох шийтгэл оногдуулсан Цагдаагийн ерөнхий газрын Нийтийн хэв журам хамгаалах, олон нийтийн аюулгүй байдлыг хангах албаны Зөрчил шалгах, мэргэжил арга зүйн хэлтсийн ахлах мэргэжилтэн, цагдаагийн ахмад Б.Ганзоригийн 2019 оны наймдугаар сарын 28-ны өдрийн 0032707 дугаартай шийтгэлийн хуудсыг хэвээр үлдээж шийдвэрлэсэн юм.

Дээрх хэргийг Нийслэлийн Эрүүгийн хэргийн давж заалдах шатны шүүхийн шүүх хуралдаанаар хянан хэлэлцээд анхан шатны шүүхийн шийтгэвэр нь хууль зүйн үндэслэлтэй гарсан гэж дүгнэж шийтгэврийг хэвээр үлдээж шийдвэрлэсэн байна.

Эх сурвалж: НИЙСЛЭЛИЙН ДАВЖ ЗААЛДАХ ШАТНЫ ШҮҮХИЙН ТАМГЫН ГАЗАР