Улсын онцгой комиссоос ирэх гуравдугаар сарын 2-ны өдрийг хүртэл хугацаанд цэцэрлэг, сургууль, сургалт, хурал цуглаан зэрэг олон нийтийн хамардаг үйл ажиллагаа зохион явуулахгүй байх чиглэл гарсан. Үүнтэй холбогдуулан гарсан нийслэлийн Засаг даргын захирамжийг хэрхэн хангаж ажиллах талаар Нийслэлийн цагдаагийн газрын урьдчилан сэргийлэх хэлтсийн мэргэжилтэн, цагдаагийн ахлах дэслэгч Б.Билгүүнээс тодрууллаа.

-Нийслэлийн Засаг даргын захирамжийн хүрээнд оолон нийтийн үйл ажиллагаа, цуглаан зохион байгуулахыг хориглосон шийдвэр гаргараал. Захирамжийн хүрээнд цагдаагийн байгууллагаас хэрхэн ажиллаж байна вэ?

-Нийслэлийн Засаг даргын нийтийн эрүүл мэндийг хамгаалах талаар зарим арга хэмжээний тухай А108 дугаар захирамжийн хүрээнд шинэ төрлийн коронавирусын халдвараас урьдчилан сэргийлэх чиглэлээр Нийслэлийн онцгой комиссын 20 дугаар хуралдааны шийдвэр, Засаг даргын нэгдүгээр сарын 27-ны өдрийн захирамжийн хэрэгжилтийг хангахаар цагдаагийн байгууллагаас энэ сарын 26, 27-нд олон нийтэд үйлчилгээ үзүүлдэг нийт аж ахуйн нэгжүүдэд шаардлага хүргүүлж ажиллалаа. Нийслэлийн хэмжээнд баар ресторан 157, караоке 169, их дээд сургуль 54, ерөнхий боловсролын сургууль 77, цэцэрлэг 90, цахим тоглоомын 98, амралтын 16 газар, мэргэжлийн сургалт үйлдвэрлэлийн долоо, үзвэр үйлчилгээний 18, биеийн тамир спортын найман байгууллага, жолооны 11 курс, хүүхдийн тоглоомын гурван төв гээд нийт 708 аж ахуйн нэгж байгууллагыг шалгаж, 1168 аж ахуйн нэгжид мэдэгдэл шаардлага хүргүүлж ажиллалаа. Мөн согтууруулах ундаагаар үйлчилдэг байгууллага шөнийн 04.00 цаг хүртэл ажилладаг байсныг 00.00 цаг болгож өөрчилсөн. Энэ хүрээнд цагдаагийн алба хаагчид тогтмол хяналт шалгалтын ажлыг явуулна.

-Шаардлагыг биелүүлээгүй аж ахуйн нэгжид ямар хариуцлага тооцох вэ?

-Зөрчлийн тухай хуулийн 15.2-д зааснаар “Төрийн албан тушаалтны шийдвэрийг үл биелүүлэх, үйл ажиллагаанд нь саад учруулах”, 15.2.2-д “Хууль сахиулах чиг үүргийг хэрэгжүүлж байгаа төрийн албан хаагчийн шаардлагыг эсэргүүцсэн, доромжилсон бол хүнийг 250 нэгжтэй тэнцэх хэмжээний төгрөгөөр, хуулийн этгээдийг 2500 нэгтэй тэнцэх хэмжээний төгрөгөөр торгоно” гэж заасан байдаг.

-Мөн соёл урлагийн үйл ажиллагаа явуулах, аялал зугаалга зохион байгуулахыг хориглосон. Цагдаагийн байгууллагаас нь бүгдэд нь хяналт тавьж ажиллана гэсэн үг үү?

-Чиг үүргийн хүрээнд хориглосон үйл ажиллагааг зохион байгуулсан асуудалд мэдээллийн дагуу таслан зогсоох, торгох, холбогдох байгууллагад нь шилжүүлэх арга хэмжээ авч ажиллана. Мөн кино үзвэр, тоглоомын төв зэрэг урлаг соёлын бүхий л газрууд ирэх гуравдугаар сарын 2-ныг хүртэлх хугацаанд үйл ажиллагаагаа зогсоох шаардлагатай.

-Захирамжийн хүрээнд хэчнээн алба хаагч ажиллах вэ?

-Өнгөрсөн 26, 27-ны өдрүүдэд цагдаагийн байгууллагаас эргүүлийн 178 чиглэлд 514 алба хаагч ажиллаж дээрх албан байгууллагуудад мэдэгдэл хүргүүлсэн. Мөн эмзэг цэгийн шалгалт, шуурхай бүлгийн шалгалтыг тогтмол зохион байгуулдаг. Өөрөөр хэлбэл, согтууруулах ундаагаар үйлчилж болзошгүй гэмт хэрэг, зөрчил үйлдэгдэх магадлалтай эмзэг цэгүүдэд ажиллана.

Б.Лхам