Шинэ оны босгон дээр генерал мөрдэс зүүсэн гурван эрхмийн нэг нь Тагнуулын ерөнхий газрын дарга Д.Гэрэл. У.Хүрэлсүхийн Засгийн газрын хамгийн эхний томилгоо нь бараг л Ерөнхий сайдын шууд удирдлага дор байдаг Тагнуулын ерөнхий газраас эхэлсэн.
Генерал Б.Хурцыг чөлөөлж, Элчин сайд асан хурандаа Д.Гэрэлийг энэ албанд очих үеэс л уг томилгоог нүдээ олсон эсэхэд эргэлзэх хүн олон байлаа. Учир мэдэх зарим нь уг томилгоог түр зуурынх ч хэмээж байв. Тагнуулын ерөнхий газрын даргын намтар түүхийг сөхвөл, дээрх яриа ор үндэсгүй ч биш бололтой. Учир нь, Д.Гэрэл дарга өдгөө 68 настай, 1952 онд мэндэлжээ.
Төрийн албаны тухай хуульд зааснаар түүний мэндэлсэн уг огноо өөрийнх нь “огцрох болзол” болоод буй юм.
Төрийн албаны тухай хуулийн 24.1 дүгээр хэсэгт хуульд өөрөөр заагаагүй бол төрийн жинхэнэ албан хаагчийг тэтгэвэр тогтоолгох насанд хүрсэн, төрийн алба хаах насны дээд хязгаарт хүрсэн мөн өөрийн санаачилгаар төрийн албанаас чөлөөлөгдөх хүсэлт гаргасан бол төрийн албанаас чөлөөлнө гэж заасан байдаг.
Тагнуулын байгууллагын даргын халааг авах үедээ л тэрбээр тэтгэврийн нас нь дөхсөн байсан бөгөөд төрийн эрх баригч номер 1, 2-той ойрын талын хүн гэх. Энэ нь ч өнөөг хүртэл суудалдаа тухалсан хэвээр байгаагаас үзвэл оргүй мэдээлэл биш болов уу. 2019 оны тавдугаар сард Г.Батхүү агсан амь насаа алдсаны дараа түүнийг үүрэгт ажлаас нь чөлөөлөх Засгийн газрын шийдвэр гаргасан гэх боловч яагаад ч юм бэ, энэ шийдвэр нь албажаагүй. Албажаагүй шалтгаан нь ганцхан. Тодруулбал, түүнийг тагнуулын байгууллагын даргаар ажиллаж байгааг зөвтгөх ганцхан л шалтгаан бий. Энэ төрийн алба мэргэшсэн, залгамж халаатай байх ёстой гэсэн хэдхэн үг. Хэдийгээр хэдхэн үг мэт боловч цаанаа маш том хариуцлага, ухамсар тээж буй нь лавтай. Шинэхэн генералын хувьд тагнуулын байгууллагын даргаар ажиллаж байсан зэрэг өндөр туршлагатай. Энэ ч утгаараа улс төрийн хөл хөдөлгөөн ихтэй өнөө үед түүнээс илүү сонголт манай улсад бараг байхгүй болов уу гэхэд болно.
Нөгөөтээгүүр, сонгуулийн жил хаяанд ирсэн энэ цаг үед түүнийг халж, сэлгэлэээ гээд ҮАБЗ-ийнхөнд тийм ч таатай үр дүн авчрахгүй нь лавтай.
Тиймээс ч Д.Гэрэл генералыг 2021 онд болох Ерөнхийлөгчийн сонгууль өнгөртөл тагнуулын байгууллагыг удирдана гэх албан бус тохиролцооны талаар бор шувуу бас нисээд амжив. Шинэхэн генерал Доржпаламын Гэрэл нь 1952 онд Улаанбаатар хотод төрсөн.
Боловсролын байдал:
1971-1975 онд ЗХУ-ын УАХХ-ны дээд сургууль;
1981-1983 онд Токиогийн гадаад хэлний дээд сургуулийг тус тус төгссөн. Хуульч, хэл судлаач мэргэжилтэй.
Ажилласан байдал:
1975-1984 онд НАХЯ-нд төлөөлөгч, ахлах төлөөлөгч;
1984-1989 онд Монгол Улсаас Япон Улсад суугаа ЭСЯ-нд атташе;
1989-1993 онд УАБХЕГ-т ахлах төлөөлөгч;
1997-1998 онд УАБХЕГ-т Тамгын хэлтсийн орлогч, Гадаад тагнуулын албаны дарга;
1998-2003 онд Монгол Улсаас Япон Улсад суугаа ЭСЯ-нд Элчин сайдын зөвлөх;
2003-2005 онд ГХЯ-ны Консулын газрын захирал;
2005-2008 онд Монгол Улсаас Япон Улсад суугаа ЭСЯ-нд Зөвлөх бөгөөд Консулын хэлтсийн дарга;
2008-2011 онд Монгол Улсаас БНСУ-д суугаа Онц бөгөөд Бүрэн эрхт Элчин сайд;
2011-2013 онд ТЕГ-ын дарга;
2013-2017 онд ГХЯ-нд “Монгол Улсын Ерөнхийлөгчийн Улаанбаатар санаачлага хөтөлбөр хэрэгжүүлэх асуудал хариуцсан” тусгай үүрэг гүйцэтгэгч Элчин сайд;
2017 оноос ТЕГ-ын даргаар томилогдон ажиллаж байна.
Онц бөгөөд бүрэн эрхт Элчин. Монголын Элчин сайд нарын клубын Ерөнхийлөгч, Монголын самбо бөхийн холбооны тэргүүний сонгуульт ажилтай. Монголын таеквондогийн холбооны хүндэт ерөнхийлөгч. МҮОХ-ны гишүүн. МҮОХ-ны ”Алтан од” шагналтай.
ТЕГ-ын “Хүндэт ажилтан”, ГХЯ-ны “Хүндэт дипломатч”.
Монгол Улсын Ерөнхийлөгчийн зарлигаар Цэргийн хүндэт медаль, Цэргийн гавъяаны одон, Байлдааны гавъяаны улаан тугийн одон, Хөдөлмөрийн гавъяаны улаан тугийн одонгоор тус тус шагнагдсан.
Г.Маргад
Сэтгэгдэл (49)