Энэ оны жүдо бөхийн ДАШТ ирэх тавдугаар сарын 19-23-ны өдрүүдэд АНЭУ-ын Абу Даби хотноо зохион байгуулагдах бөгөөд таван тивийн 109 орны 675 шилдэг жүдоч хурд хүч, авхаалж самбаагаа сорино. Тус тэмцээнд манай улсаас 13 жинд 18 жүдоч хүч үзэх гэж байгаагийн ес нь эрэгтэй, ес нь эмэгтэй. Өнгөрсөн оны ДАШТ мөн л энэ сард болж өнгөрсөн билээ. Бид та бүхэнд удахгүй эхлэх ДАШТ-д хүч сорих жүдочдыг цувралаар танилцуулж байгаа билээ.
Энэ удаад бид эмэгтэйчүүдийн -57 кг-ын жинд барилдах ОУХМ Л.Энхрийлэн, М.Ичинхорлоо нарыг онцолж байна.
Л.Энхрийлэн гэж хэн бэ?
Өнгөрөгч 2022 оны ДАШТ-ээс хүрэл медаль хүртээд эх орондоо ирэхдээ хэвлэлд "2023 оны ДАШТ-д түрүүлж, Монголын анхны эмэгтэй Олимпын наадмын аварга болмоор байна" гэж хэлж байв. Энэхүү амлалтаа биелүүлж чадаагүй ч хүрэл медаль хүртсэн. 2024 оны ДАШТ ч ойрхон иржээ. Бид түүний захыг мушгих л үлдэв.
Лхагватогоогийн Энхрийлэн анх 2016 онд тодрон гарч ирсэн нь тухайн жилийн Улаанбаатар Их дуулга тэмцээн байв. Тэрбээр тэмцээнд 2011 оны Оюутны дэлхийн аварга, 2012 оны Дэлхийн аварга, Японы алдарт бөх Мегуми Ишикаваг базари үнэлгээгээр ялж, 17-хон насандаа Их дуулга тэмцээний аварга болж байлаа. Үүнээс хойш тэрбээр тус тэмцээнээс 2022 онд дахин нэг алтан медаль хүртжээ. Тэрбээр 1998 оны 12 дугаар сарын 28-нд, шинэ жилийн баярын өмнөхөн мэндэлсэн, өдгөө 26 настай. Гал шиг омголон яваа Монголын шилдэг жүдоч билээ.
Түүний биеийн өндөр 160 см ажээ.
Түүний гаргасан амжилтуудаас,
- 2022 оны Ташкентын ДАШТ - Хүрэл медаль
- 2013 оны өсвөрийн ААШТ - Мөнгөн медаль
- 2019 оны Азийн АШТ - Хүрэл медаль
- 2017 оны Залуучуудын ДАШТ - Мөнгөн медаль
- 2016, 2022 оны Улаанбаатар Их дуулга - Алтан медаль
- 2018 оны Дюссельдорфын Их дуулга - Хүрэл медаль
- 2021 оны Абу Дабигийн Их дуулга - Хүрэл медаль
- 2023 оны ДАШТ - Алтан медаль
- 2024 оны ААШТ - Алтан медаль
- 2024 оны Душанбаегийн Их дуулга тэмцээн - Хүрэл медаль
Эдгээр амжилтуудыг богинохон хугацаанд гаргасан нь түүний хичээнгүй байдал, бэлтгэлдээ үнэнч, амжилтандаа амташдаг чанартай нь холбоотой гэж багш нь ярьжээ. Тэрбээр Улсын аварга шалгаруулах тэмцээнээс 2016 онд хүрэл, 2018 онд мөнгө, 2019 онд алтан медаль хүртэж байлаа. Амжилт нь өдрөөс өдөрт, жилээс жилд ахисаар яваа түүнийг Монголын ард түмэн "Энхрий охин" хэмээн хочилдог.
М.Ичинхорлоо гэж хэн бэ?
М.Ичинхорлоо мастерыг Азербайжан улсын нэрийн өмнөөс барилдаж байсан гэдгээр нь хүмүүс сайн мэдэх байх. Тэр 2016 оны олимпын наадмын мөнгө, ДАШТ-ий нэг алт, хошой хүрэл, Азийн АШТ-ий хошой хүрэл, Азийн наадмын нэг алт, хошой хүрэл медальт бөх МУГТ Д.Сумъяагийн залгамж халаа билээ. Түүний жинд ОУХМ, ДАШТ-ий хүрэл медальт Л.Энхрийлэн буй.
Тэрбээр 2021, 2022, 2023 онуудын Улсын аварга шалгаруулах тэмцээнд аваргалж, жиндээ илүү байгаагаа харуулсан шилдэг жүдоч билээ. Түүнээс өмнө 2017 онд гурван жилийн гэрээтэйгээр Азербайжан улсын нэрийн өмнөөс Б.Буянхишиг, Э.Базаррагчаа нарын хамт явсан. Улмаар 2017-2019 онуудад Азербайжаны аварга болсон байдаг.
Энэ талаараа тэрбээр "Бид Азербайжаны иргэншил авсан хэдий ч тэд улсын аварга дээрээ өөрсдийн тамирчдадаа илүү дэмждэг юм билээ. Бидэнд үнэлгээг илт өгөхгүй, өөрсдийн бөхчүүдэд давуу тал өгөөд, биднийг хожигдуулчихдаг байсан даа" хэмээн хэвлэлд ярьж байсан удаатай.
Түүний найз залуу Үндэсний бөхөөр барилддаг, аймгийн заан цолтой. Тэр багадаа ах нартайгаа барилдаж, ноцолдож өссөн бөгөөд 12 настайдаа бөхийн спортын замд эргэж буцалтгүй орсон гэнэ. Энэ тухайгаа "Би тавдугаар анги төгсдөг хавар ангийхантайгаа ноцолдож яваад санаандгүй жүдо бөхийн секцэнд орсон юм. Гэрийнхэндээ энэ талаараа огт хэлээгүй. Тэгээд зуны амралт болоод хөдөө яваад өгсөн. Намар ирсэн чинь намайг жүдо бөхийн секцэнд орсон гэдгийг ээж, аав хоёр олоод мэдсэн байлаа. Аав, ээж хоёр эмэгтэй хүүхэд гар хуруу, бие нь эвдэрнэ гээд жүдогийн секцэнд явуулдаггүй. Би гөжүүдлэн, тас зөрсөөр байгаад л явсан даа. Одоо харин аав, ээж хоёр бүх л үед дэмжиж тусалж байгаа. Миний үнэнч дэмжигч фен болсон" гэжээ.
Түүний анхны багш бол ЕБС-ийнх нь биеийн тамирын багш Амаржаргал гэж хүн бий. Тэр хүний гар дээрээс л бүх юмыг сурч, бөхийн спортод дур сонирхолтой болж байж. Улмаар Гавьяат дасгалжуулагч Ш.Цэвэлмаа багш дээрээ 2015 оноос хойш одоог хүртэл бэлтгэл сургуулилалтаа хийж байна. 2020 оны аравдугаар сарын сүүлчээр Монголдоо ирээд Ш.Цэвэлмаа багштайгаа ярилцаж байгаад “Алдар” спорт хорооны дасгалжуулагч, Үндэсний шигшээ багийн хүчний бэлтгэлийн Ч.Март багшид шавиар орсон бөгөөд хоёр багшийн удирдлага дор бэлтгэлээ хийдэг.
Украины Дариа Билодид тэргүүтэй дэлхийн шилдгүүд багтсан -57 кг-ын жинд тэрбээр ДАШТ-ээс медаль хүртэх бүрэн боломжтой тамирчин юм. Дэлхийн шилдгүүдтэй золгож явсан тэр удахгүй Монголын ард түмнийг баярлуулах жүдоч мөнөөсөө мөн билээ. Тэр хамгийн сүүлд медаль хүртсэн нь 2022 оны Загребийн Гранпри тэмцээн билээ.
Л.Сайнаа
Сэтгэгдэл (5)