Шинэ зууны эхэнд зохиолын дууны ертөнцөд нэгэн шинэ өнгө нэмж, асар хурдтайгаар олонд танигдсан уран бүтээлч бол гавьяат жүжигчин Самандын Жавхлан юм. Түүний дуулсан дуу бүр хит болдог гэвэл давсалсан болохгүй биз ээ. Тэр урлагт зүтгээд 23 дахь жилтэйгээ золгож байна. Түүний хамгийн дуулиантай, бас хамгийн олон үзэгч үзсэн тоглолтыг сонирхуулая.

Хамгийн анх 2003 онд Монгол бөхийн өргөөнд хоёр өдөр дараалан тоглолт хийхэд нь санасанаас маш олон хүн ирсэн. Хөл тавих зайгүй хурсан үзэгчид түүний дуулсан дуу бүрийг тоглолт эхлэхээс дуусах хүртэл даган дуулцгааж байсныг санаж байна.

2004 оны намар Төв цэнгэлдэх хүрээлэнд “Монголын үнэртэй салхи” тоглолтоо зохион байгуулахад 40 мянга орчим хүн ирсэн ба тухайн үеийн уран бүтээлчид Монгол бөхийн өргөө, UB palace-ийг арай ядан дүүргэдэг байсан даа. 2007 онд Монгол бөхийн өргөөнд “Түмний минь дуртай дуунууд” тоглолтоо долоон өдөр зохион байгуулахад сул суудал харагдаагүй юм. Өргөөг долоон өдөр дүүргэсэн хамтлаг, дуучин өмнө нь лав байгаагүй билээ. 2014 онд “Монголд мэндэлсэн өдөр минь” тоглолтоо есөн өдөр зохион байгуулсан юм.

С.Жавхлан тоглолтоо ихэвчлэн хоёр өдөр зохион байгуулах зар хүргэдэг ч үзэгчдийн хүсэлтээр ийн 5-9 өдөр болж тэлдэг нь хэр чансаатай уран бүтээлч болохыг илтгэнэ.

 

Энэ сарын 30-нд Төв цэнгэлдэх хүрээлэнд “Дулаахан намар” тоглолтоо хийх гэж байна. Тоглолтын тасалбар дуусах дөхжээ, такси үйлчилгээний “UB cab” компани түүхт 10 жилийнхээ ойг тохиолдуулан ажлын хамт олондоо тоглолтын тасалбар авч өгөх талаар урьдчилсан байдлаар уулзжээ. Тус компанид 35 мянга гаруй жолооч хамаардаг байна.  

А.Болд