Дэлхийн хошой аварга, ОХУ-ын гардан тулааны спортын мастер Б.Галсандоржтой ярилцлаа. Тэрбээр 2003 оноос Кикбоксын спортоор хичээллэж эхэлсэн бөгөөд энэ хугацаанд сонирхогчдын кикбоксын ДАШТ-д дөрвөн удаа оролцож, хоёр удаа аварга болсон нэгэн юм.

-Кикбоксын спортоор хэзээнээс хичээллэж эхэлсэн бэ? Энэ спортод хэн таныг хөтлөв?

-Намайг Б.Галсандорж гэдэг. Би 2003 оноос н.Энхбаатар багшийнхаа удирдлага дор Олимпын таеквондогоор хичээллэж байлаа. Тухайн үед багш маань "Чи таеквондогоос илүү Кикбоксоор хичээллэвэл амжилт олох юм байна" хэмээн зөвлөж байсан юм. Тэгээд л багшийнхаа зөвлөснөөр кикбоксоор хичээллэхээр болж Ж.Нарантунгалаг багш дээрээ очиж байсан даа. Тэр цагаас хойш буюу 2007 оноос кикбоксоор хичээллэж, олон улсын болон дотоодын тэмцээн уралдаануудад амжилттай оролцож байна.

-Та өнгөрсөн онд ДАШТ-ний аварга болсноор Дэлхийн хошой аварга болсон шүү дээ. 2023 оны ДАШТ-ий сонин сайхнаас хуваалцахгүй юу? Өрсөлдөгчид нь хэр байв?

-2013 оны ДАШТ-д анх оролцож хүрэл медаль хүртэж байсан. Үүний дараа 2019 онд ДАШТ-ий 75 кг-ийн жинд аварга болж байлаа. Өнгөрсөн жил аваргаа дахин баталж, хошой аварга болсон. 2023 оны ДАШТ-д 1600 орчим тамирчин оролцсон өрсөлдөөн ихтэй тэмцээн болсон. ДАШТ-д оролцож буй тамирчдад сул тамирчин гэж байхгүй л дээ. Монгол Улсын тамирчид нийт таван медальтай эх орондоо ирсэн.

-Тэмцээн уралдаанд оролцоход тамирчдын сэтгэлзүй чухал байдаг шүү дээ. Таны хувьд сэтгэлзүйгээ хэрхэн бэлддэг вэ?

-Бэлтгэлийн өмнө болон дараа төвлөрлийн дасгал буюу бясалгал хийдэг. Мөн түүхийн ном уншдаг. Чингис хаан, баатруудын тухай уншиж судалснаар айх айдасгүй болдог. Түүхтэйгээ холбож ихэнх тамирчид өөрсдийн сэтгэл зүйгээ бэлддэг дээ.

Тулааны спорт бол хүн зодохыг бус хүнийг хайрлах, хүндлэх ёс суртахууныг заадаг. Хүндлэлээр эхлээд, хүндлэлээр дуусдаг зарчимтай спорт. Гаднын тамирчид биднийг танихгүй хэр нь л Монголчуудын байлдан дагууллаар мэддэг юм билээ. Тиймдээ ч тэд  түрүүлж ирээд мэндлэх тохиолдол цөөнгүй гарсан.

-Тулаанд ялаад гараа өргүүлэх мэдрэмж ямар байдаг вэ?

-Рингэн дээр гарах мэдрэмж бол маш хүнд. Гараад ялалт байгуулна гэдэг бол маш том аз жаргал байдаг.

-Хамгийн анх рингэн дээр гарч байсан үеэ эргэн дурсвал? 

-Анх 2004 онд Багануурт болсон тэмцээнд оролцож байсан. Тухайн үед их айдастай байсан л даа. Шөнө ч нойр хүрэхгүй, тэмцээний тухай л бодсоор өглөө болгосон.  Тэр тэмцээнд хүрэл медаль хүртэж байлаа.

-Таны хувьд өнөөдрийг хүртэл хийсэн тулаанаасаа нэгийг онцол гэвэл ямар тулаан сэтгэлд тань бууж байна вэ?

-Монголд болсон хоёр тулаан санаанд орж байна. Холимог тулаанаар 2009 оны үед маш хүнд тулаан хийж байсан. Мөн сорил тулаанд мэргэжлийн бээлий, хамгаалалтгүй тулаан хийж байлаа. Тухайн тулаанд аваргын төлөө тулалдаад ялагдаж байсан. Дараагийн тулаан гэвэл маш хүчтэй өрсөлдөгчтэй тулалдаж байсан. Энэ тулаанд өөрт буй хүч чадлаа бүгдийг нь ашигласан гэхэд болно доо. Тэмцээний дараа хоёр өдөр бие буларч хэвтэж байлаа. Энэ тулааны хажууд 2019 оны ДАШТ-ий тулаан хөнгөн санагдаж байсан даа.

-Тэгэхээр таны хамгийн хүчтэй өрсөлдөгчид Монгол тамирчид байх нь ээ?

-Тийм ээ. Монгол тамирчид. Тэр дундаа миний үеийн найз нөхөд маань хамгийн хүчтэй өрсөлдөгч. Энэ дашрамд, ирээдүйн аварга болоход нөлөөлсөн найз нөхдөдөө баярлалаа гэж хэлмээр байна. Тулаанд дуртай болоход минь нөлөөлсөн Д.Батгэрэл найздаа баярлалаа гэж хэлье.

-Кикбоксын спорт олон улсад олимпоос дутахааргүй хөгжсөн спорт. Харин таны бодлоор энэ спорт Монгол Улсад хэрхэн хөгжиж байна вэ?

-Босоо тулааны хөгжил маш сайн явж байгаа. Холимог тулааны хөгжил сүүлийн үеийн тэмцээн уралдааныг харахад хөгжиж байгаа санагддаг.

-Тэмцээн уралдаанд явахад санхүү, мөнгөний асуудал тамирчин бүрд тулгардаг шүү дээ. Энэ асуудлыг хэрхэн шийдвэрлэдэг вэ?

-Миний оролцож буй тэмцээн уралдаан бүрийг миний өөрийн ажилладаг “Өсөх зоос” ХХК маань 100 хувь дэмжин ажилладаг. Хэрэв санхүүжилт, дэмжин ажилладаг компани маань байгаагүй бол би дэлхийн хошой аварга болохгүй байх байлаа.

Мөн өнгөрсөн онд дэлхийн хошой аварга болоод ирэхэд минь “Өсөх зоос” ХХК-ны зүгээс гурван өрөө байр бэлэглэсэн. Компанийнхаа хамт олонд болон намайг хамгийн их дэмждэг Ч.Чинбат захиралдаа баярлалаа гэж хэлмээр байна.

-Кикбокс олимпын бус төрөлд багтдаг шүү дээ. Олимпын төрлөөс ялгагдах зүйл нь юу байна вэ? Таны анзаарч буйгаар...?

-Тийм ээ. Кикбокс бол олимпын бус төрөлд ордог. Олимпын болон олимпын бус төрөл гэж бий.  Энэ хоёрын хооронд их ялгаа бий л дээ. Үүнээс болж гавьяа шагнал хүртэл ялгаатай ирдэг. Уг нь тамирчин бүр л Монгол Улсаасаа гараад л Монголын нэрээр явдаг шүү дээ.

-Тулааны спортоор, тэр дундаа кикбоксын спортоор хичээллэж байгаа болон энэ спортод сонирхолтой залууст юу гэж зөвлөх вэ?

-Аливаа хүн юу хүсэж байна түүнийгээ хийгээд үзэхэд буруудах зүйл байхгүй. Амжилтад хүрсэн хүн бүр хөдөлмөрлөсөн байдаг. Тиймээс энэ спортоор хичээллэж буй дүү нартаа хандаж хэлэхэд бэлтгэл сургуулилтаа сайн хийгээрэй гэж хэлье. Мөн тулааны бичлэг, тэмцээн уралдаануудыг сайн үзэх хэрэгтэй.

-Таны цаашдын зорилго юу вэ? 2024 онд юуг төлөвлөж байна вэ?

-Цаашид холимог тулаанд хүч үзэх бодолтой байна. Энэ талаар маш сайн бодсон л доо. Холимог  тулаан бол тулааны бүх өшиглөлт, цохилтыг хүлээн зөвшөөрдөг. Энэ төрөл дэлхийд хүчээ авчихсан төрөл. Тийм учраас энэ төрлөөр хичээллэх төлөвлөгөөтэй байна.

-Ярилцсанд баярлалаа.