Соёлын сайд Ч.Номин татвар төлөгчдийн мөнгөөр өөрийн зөвлөх С.Оюунбилэгийг Кембрижд сургасан талаар бид мэдээлсэн. Гэтэл тус сургалт цаанаа цэвэр боловсролын зорилготой биш, "том суудалд зөөлөн газардуулах" нэгэн төлөвлөгөөний эхлэл байжээ гэх хардлагыг төрүүлж эхлэв.

С.Оюунбилэг нь Кэмбрижд суралцаж ирмэгцээ шууд л Соёлын яаман дээр "бужигнуулж" эхэлжээ. Тухайлбал, Төрийн нарийн бичгийн даргын түр орлон гүйцэтгэгч А.Даваажаргал чөлөө авсан завсарт, түүний гарын үсгийн дардсыг ашиглан өөрийгөө Төрийн захиргааны удирдлагын газрын даргаар "томилсон" байна. Үүгээр ч зогсохгүй, уг өөрийгөө томилсон тушаалаа үндэс болгон, Сайд Ч.Номин ч түүнийг “албан ёсоор” Төрийн нарийн бичгийн даргын албан үүргийг түр орлон гүйцэтгэгчээр томилжээ.

Энэ өндөр албан тушаалд очихын тулд төрийн албанд дор хаяж 16 жил тасралтгүй ажилласан байх шаардлага тавигддаг ч С.Оюунбилэгийн хувьд энэ шаардлагыг хэрхэн хангаж, ямар замаар "шургаж" гарч ирсэн нь тодорхойгүй байгаа нь анхаарал татаж байна. Соёлын яаманд өрнөсөн энэ "бантан"-гаас харахад төрийн албыг “танил тал, тушаал дардас” хосолсон хувийн тоглоомын талбар болгосон гэх хардлага улам тодорсоор байна.

С.Бат