ЭШЛЭЛ 1
Өнөөдөр бид эх орныхоо тусгаар тогтнол, ард иргэдийнхээ амар тайван амьдралыг сахин хамгаалдаг Онцгой байдлын байгууллагын 21 жилийн ойг тэмдэглэн, бахархал, урам зориг, хариуцлага, манлайллын утгыг нэгэн дор мэдэрч байна.
ЭШЛЭЛ 2
Энэ бол зөвхөн байгууллагын түүхэн ой биш, харин Монгол төрийн бат бэх тулгуур болсон үндэсний аюулгүй байдлын тогтолцооны чадавх, чадамжийг үнэлэх, дүгнэх онцгой мөч. Мөн цаг ямагт сонор соргог байж, сэрэмж алдахгүйн чухлыг сануулж байдаг өдөр билээ.
ЭШЛЭЛ 3
Онцгой байдлын албанд зүтгэнэ гэдэг бол эгэл жирийн сонголт биш. Энэ бол улс орон, ард иргэдийнхээ өмнө амь бие, сэтгэл зүрхээ зориулж, ам тангараг өргөсөн эрхэм үйлсийн төлөөх итгэл үнэмшил, үнэт зүйлийн илэрхийлэл юм.
ЭШЛЭЛ 4
Аливаа гамшиг, аюул ослын өмнө хамгийн түрүүнд очиж, хүндийг нь үүрч, шийдлийг хамгийн богино хугацаанд гарган, тэвчээр, зоригийн сорилтод тэнцэж чаддаг хүмүүс бол та бүхэн. Зовлон бэрхшээл дунд ч зориг алдалгүй зогсож, хөлс хүчээ зориулан, хүн ардаа хамгаалж чаддаг жинхэнэ алба хаагчид юм.
ЭШЛЭЛ 5
Монголын төр, ард түмэн та бүхний эр зориг, сэтгэлийн тэнхээ, хариуцлага, ухаалаг шийдвэрт итгэдэг. Энэхүү итгэл бол зүгээр нэг үг бус, харин 21 жилийн түүх, сорилтыг давах тэсвэр, гамшгийн халуун цэгт эрсдэлийг сөрөн зогсох хат суусан уламжлал, амьдрал аварч, итгэл өгч, улс орноо сэргээн босгох үнэт баталгаа билээ.
ЭШЛЭЛ 6
Сүүлийн арван жилд манай улсад тохиолдсон аюулт үзэгдлийн давтамж өмнөх арван жилтэй харьцуулахад 32 хувиар өссөн бол цаг уурын гаралтай гамшиг 2.9 дахин нэмэгдээд байна. Энэ бол бидний зүгээс системийн шинжтэй өөрчлөлт, урьдчилан сэргийлэх бодлого, сөрөн тэсвэрлэх чадавхын талаар цоо шинэ, нухацтай хандлага хэрэгтэй болсны бодит илэрхийлэл юм.
ЭШЛЭЛ 7
Сүүлийн жилүүдэд 21 шинэ салбар нэгж байгуулагдаж, байгууллагын хүрээ улсын хэмжээнд 40 гаруй хувиар тэлсэн нь томоохон ахиц юм. Тусгай зориулалтын автомашин, тоног төхөөрөмж, хувцас хэрэгслийн хангалт сүүлийн 20 жилийн хамгийн өндөр түвшинд хүрсэн нь төр, засгийн итгэл дэмжлэгийн тод илрэл юм.
ЭШЛЭЛ 8
Ур чадвартай, ухаалаг, хариуцлагатай хүний нөөц бол байгууллагын үнэт капитал. Өнөөдөр бид гадаад, дотоод сургалтыг тогтмолжуулж, англи хэлний сургалтыг эрчимжүүлэн, ОХУ, БНХАУ зэрэг улстай хамтарсан сургуулилтуудыг өргөжүүлж эхэллээ. Энэ бол олон улсын түвшинд чадавхтай, мэргэшсэн боловсон хүчин төлөвшүүлэх чухал эхлэл юм.
ЭШЛЭЛ 9
Бид гамшгийн үр дагаврыг зөвхөн даван туулах биш, урьдчилан тооцоолж, тэсвэртэй дэд бүтцээр бэхжүүлсэн, сэргэх чадвартай улс байх ёстой. Үндэсний сөрөн тэсвэрлэх чадавхыг бэхжүүлэх нь өнөөдрийн хэрэгцээ төдийгүй ирээдүйн тогтвортой хөгжлийн баталгаа юм.
ЭШЛЭЛ 10
Та бүхний хичээл зүтгэл, манлайлал, нэр төртэй үйлс Монголын ард түмний итгэл найдвар, төрийн хүндэтгэл, нийгмийн үнэт зүйл болон хувирч тодорч байна. Онцгой байдлын байгууллагын 21 жилийн ойн энэ өдөр та бүхэндээ гүн талархал илэрхийлж, эрүүл энх, амжилт бүтээл, сайн сайхан бүхнийг хүсэн ерөөе.
Сэтгэгдэл (1)