БАРИМТ 1
Оюунгэрэлийн Наранбаатар нь Өвөрхангай аймгийн Хархорин суманд 1992 оны хоёрдугаар сарын 29-нд төржээ. Өөрөөр хэлбэл тэр "өндөр жил"-ийн дөрвөн жилд нэг удаа тохиодог өдөр төрсөн бөх юм.
БАРИМТ 2
Биеийн өндөр 185 см, биеийн жин 135 кг.
БАРИМТ 3
"Их Монголын Хүчтэн" дэвжээ, "Алдар" спорт хороо, ЗХ-016 анги, Алтан Жолоо групп, Хүссэн Зүг ХХК-ийн нэр дээрээс барилддаг.
БАРИМТ 4
13 жилийн тэртээ 2012 онд Сумын заан цолонд хүрсэн.
БАРИМТ 5
2016 онд Өвөрхангай аймгийн баяр наадамд зургаа давж шөвгөрөн "Аймгийн харцага", 2018 онд Өвөрхангай аймгийн баяр наадамд одоогийн Улсын начин_, тухайн үеийн аймгийн арслан Т.Довчинсэмбээгээр найм даван түрүүлж "Аймгийн арслан" цол хүртжээ. Улмаар 2021 оны Өвөрхангай аймгийн баяр наадамд аймгийн заан Б.Бямбадоржоор долоо даван түрүүлж "Хурц" чимэг нэмсэн байна.
БАРИМТ 6
Тэрбээр бөхийн өргөөний аймаг, цэргийн цолтны барилдаанд хоёр удаа түрүүлжээ. Тодруулбал, 2023 онд Соёлын гавьяат зүтгэлтэн, улсын начин Содномын Эрхэмбаярын нэрэмжит барилдаан, 2022 онд Хэнтий аймгийн Цэнхэрмандал сумын харьяат, улсын начин Бадарчийн Батбаярын нэрэмжит барилдаанд тус тус түрүүлсэн.
БАРИМТ 7
Мөн гурван удаа үзүүрлэсэн байдаг. Тодруулбал, 2024 онд Дашчойлин хийдийн нэрэмжит, Сар шинийн аймаг цэргийн цолтой бөхийн барилдаан 2022 онд Улсын харцага Жамцын Борын нэрэмжит барилдаан, Дашчойлин хийдийн нэрэмжит, сар шинийн баярт зориулсан аймаг цэргийн цолтой бөхчүүдийн барилдаанд тус тус үзүүрлэжээ.
БАРИМТ 8
Түүнчлэн 2016 онд болсон XVII жарны гал БИЧИН жилийн сар шинийн баярт зориулсан Таравлин хийдийн нэрэмжит сумын цолтой бөхчүүдийн барилдаанд одоогийн улсын харцага Б.Зоригтбаатарт унан үзүүр булаажээ.
БАРИМТ 9
Мөн Бөхийн өргөөнд таван удаа их шөвөгт шалгарсны хоёр нь Улс, аймагт, гурав нь Аймаг, цэрэгт байна.
БАРИМТ 10
О.Наранбаатарыг хүмүүс олон жил "улсын цол аваасай" хэмээн харсан. Олны хүсэл биелж өнөө жил Улсын аварга О.Хангайг илүүрхэн улсын цолны босго алхав. Өөрийн хүчээр цол авсан гэдгээ баталж, Өндөр гэгээний даншиг наадмын чансаа өндөр 512 бөхийн барилдаанд зургаа давсан юм.
