БАРИМТ 1
Түүнийг Увс аймгийн Түргэн сумын харьяат бөх, Батбаатарын Цагаанбанди гэдэг.
БАРИМТ 2
"Алдар" спорт хороо, ЗХ-326 анги, Билгүүн Группийн бөх.
БАРИМТ 3
Тэрбээр аав, ээжийнхээ талаас бөхийн удамтай.
БАРИМТ 4
Ээжийнх талаас ойрын төрөл бөх гэвэл Увс аймгийн Түргэн сумын харьяат Аймгийн арслан Буянтогтохын Ганзориг гэх хүчтэн бий. Тэрбээр 2000 онд Аймгийн арслан цолонд хүрч байсан аж. Ганзориг ах нь түүнд үргэлж зөвлөж, дэмждэг гэнэ.
БАРИМТ 5
Харин аавынх нь ах сумын заан н.Сүхтулга гэж хүн байдаг. Мөн аймгийн арслан Б.Нямсамбуу, Г.Цоггэрэл бид нэг удмын бөхчүүд ажээ.
БАРИМТ 6
Тэрбээр анх Анх 2016 онд аймгийн заан Т.Хайдав багшийн удирдлагад үндэсний бөхийн сууриа тавьж байжээ.
БАРИМТ 7
Улмаар 2018 онд дунд сургуулиа төгсөөд хот руу ирж “Аварга” биеийн тамирын дээд сургуульд элсэж гавьяат багш Б.Адьяахүү, Б.Батхуяг нарын шавь болж байсан гэнэ.
БАРИМТ 8
Сургуулиа 2022 онд төгсөөд “Увс нуур” галдаа нэгдэн, бэлтгэл сургуулилтаа тасралтгүй базааж байна.
БАРИМТ 9
Б.Цагаанбанди нь 2018 онд Сумын начин цол хүртсэн.
БАРИМТ 10
2020 онд Сумын заан, 2022 онд цолоо баталжээ. Энэ л цагааш хойш тэр Бөхийн өргөөнд босоо явсан юм.
БАРИМТ 11
Харин өнөө жилийн Говьсүмбэр аймгийн баяр наадамд түрүүлж, Аймгийн арслан цолонд хүрсэн.
БАРИМТ 12
Тэрбээр Бөхийн өргөөнд болдог Сумын заан цолтой болон залуу бөхчүүдийн ээлжит барилдаанд 2024, 2025 онуудад ГУРВАН удаа түрүүлсэн. Үүний хоёр удаад нь 10 давж байв.
БАРИМТ 13
Мөн нэг удаа үзүүр булаасан нь 2024 оны тавдугаар сард байлаа. Тэгэхдээ тэр Бөхийн өргөөнд гурван түрүүтэй, Увс аймгийн Баруунтуруун сумын харьяат Сумын начин Э.Ганболдод унажээ.
БАРИМТ 14
Тэрбээр мөн дунд шөвөгт хоёр, бага шөвөгт гурван удаа шалгарсан. Тэрбээр мөн өнөө жилийн Цагаан сарын баярт зориулсан Сумын заануудын барилдаанд түрүүлсэн.
БАРИМТ 15
Шинэхэн аймгийн цолтон тэрбээр "Алтан цом"-ын төлөөх барилдаанд Дархан аварга Н.Батсуурь ахлагчтай "Хамаг Монгол" багийн бүрэлдэхүүнд сонгогдож, сэлгээнээс гарч гурван барилдаанд хийгээд давсан. Тодруулбал тэр, гуравдугаар тойрогт Улсын үнэн зоригт харцага Б.Зоригтбаатарыг, дөрөвдүгээр тойрогт Улсын заан С.Сүхбатыг, тавдугаар тойрогт Аймгийн арслан Б.Шаравжамцыг хаяжээ.
