БАРИМТ 1
Рэнцэнбямбын Пүрэвдагва нь 1985 оны 11 дүгээр сарын 21-нд төрсөн. 40 настай.
БАРИМТ 2
Архангай аймгийн Булган сумын уугуул.
БАРИМТ 3
Биеийн өндөр 183 см, биеийн жин 125 кг.
БАРИМТ 4
"Бөхбилэгт" дэвжээ, "Алдар" спорт хороо, Алтан Дорнод Монгол ХХК-ийн бөх.
БАРИМТ 5
2008 онд Архангай аймгийнхаа баяр наадамд түрүүлэн арслан цолыг хүртэж, 2009 оны тус наадамд үзүүр булаав. 2010 онд Хэнтий аймагт цолоо баталжээ.
БАРИМТ 6
2012 онд Улсын наадамд 5 давж Улсын начин цол хүртсэн. Тэгэхдээ хоёрын даваанд Аймгийн арслан Б.Ганбаатар, гурвын даваанд Улсын начин Б.Одхүү, дөрвийн даваанд Улсын харцага Г.Ганхуяг, тавын даваанд Улсын гарьд И.Доржсамбуу нарыг тус тус давжээ. Харин зургаагийн даваанд Улсын гарьд Д.Рагчаад өвдөг шороодсон.
БАРИМТ 7
2014 онд Улсын наадамд 5 давж Өсөх идэр чимэг нэмсэн. Тэгэхдээ хоёрын даваанд Аймгийн арслан Д.Батбаяр, гурвын даваанд Аймгийн арслан Д.Болдбаатар, дөрвийн даваанд Улсын харцага А.Бямбажав, тавын даваанд Улсын заан Б.Батмөнх нарыг хаяжээ. Харин зургаагийн даваанд тухайн үед Улсын харцага байсан Дархан аварга Н.Батсуурьт унасан юм.
БАРИМТ 8
Тэрбээр Улсын баяр наадамд нийт найман удаа гурав давсан.
БАРИМТ 9
Улмаар 2016 оны Тулгар төрийн 2225, Их Монгол улсын 810, ардын хувьсгалын 95 жилийн ой, үндэсний их баяр наадамд үзүүр булааж Улсын арслан цолонд хүрсэн юм. Уг наадамд тэрбээр нэгийн даваанд Сумын заан Б.Мөнхболдыг, хоёрын даваанд Аймгийн начин Э.Төгөлдөрийг, гурвын даваанд Аймгийн арслан Б.Баярхүүг, дөрвийн даваанд Аймгийн арслан Б.Бат-Амгаланг, тавын даваанд Аймгийн арслан Н.Батсайханыг, зургаагийн даваанд тухайн үеийн Аймгийн арслан одоогийн Улсын начин Б.Чимэдванданг, долоогийн даваанд Улсын гарьд Б.Гончигдамбыг, наймын даваанд Улсын аварга П.Бүрэнтөгсийг, есийн даваанд Дархан аварга Н.Батсуурийг тус тус хаясан. Улмаар түрүү бөх Ч.Санжаадамбад өвдөг шороодсон юм.
БАРИМТ 10
Улсын арслан цол хүртсэнээсээ хойш тэрбээр 2020 оны Улсын баяр наадамд зургаа давжээ. Тэгэхдээ тавын даваанд Улсын начин Б.Эрдэнэхүүг, зургаагийн даваанд Улсын харцага Б.Пүрэвгарьдыг хаясан. Улмаар тухайн үеийн Улсын харцага М.Бадарч гарьдад унасан юм. Гэвч наадмын дараах допингийн тестээр хориотой бодис илэрсэн тул тус амжилтыг хүчингүйд тооцсон.
БАРИМТ 11
Тэрбээр улсын арслан цолтнуудын доороосоо хоёрт эрэмбэтэй. Түүний доор Говьсүмбэр аймгийн Сүмбэр сумын харьяат Улсын арслан Д.Азжаргал бичигдэж байна.
БАРИМТ 12
Тэрбээр нутгийнхаа хүчтэн Улсын гарьд Д.Рагчаагийн ойрын хамаатан гэгддэг.
БАРИМТ 13
Мөн тэр 2009 онд болсон "Монгол хүчтэн" хэмээх шоу нэвтрүүлэгт оролцож финалд шалгарсан.
БАРИМТ 14
Р.Пүрэвдагва нь 2015 оноос эхлэлтэй Хүрээ цам-Даншиг наадамд 2015-2018 онуудад завсаргүй дөрвөн удаа түрүүлсэн ховор амжилтын эзэн. Ингэснээр тэр Даншгийн дархан аварга цолтон болсон.
БАРИМТ 15
Бөхийн өргөөнд улсын цолтой 15 удаа, аймгийн цолтой нэг удаа түрүүлсэн. Аймгийн цолтой түрүүлсэн барилдаан нь 2012 оны Баянхонгор аймгийн нэрэмжит Аймаг цэргийн цолтой бөхийн барилдаан байв.
БАРИМТ 16
Улсын цолтой анхны түрүүгээ 2012 оны Чингэлтэй хайрханы хишиг барилдаанаас хүртэж байв. Улсын харцага А.Цацабширийг хаян түрүүлж байжээ.
БАРИМТ 17
Хамгийн сүүлд тэр 2024 оны тавдугаар сард "Их Богд" дэвжээний 20 жилийн ойд зориулсан, Баянхонгор аймгийн Баянбулаг сумын харьяат, улсын харцага Даш-Очирын Батболдын нэрэмжит барилдаанд түрүүлсэн.
БАРИМТ 18
Бөхийн өргөөнд улсын цолтой 12 удаа үзүүр булаасан. Харин аймгийн цолтой хоёр удаа үзүүрлэжээ. Аймгийн цолтойгоор 2011 оны Дорноговь аймаг, МУ-ын Арслан Г. Намжилваанчигийн нэрэмжит Аймаг цэргийн цолтой бөхийн барилдаан, 2012 оны Сар шинийн баярт зориулсан Аймаг цэргийн цолтой бөхчүүдийн барилдаанд үзүүрлэсэн.
БАРИМТ 19
Тэрбээр аймгийн цолтойдоо Сар шинийн баярт зориулсан барилдаанд үзүүрлэж байсан бол улсын цолтойдоо уг амжилтаа давтаж байв. Тодруулбал, 2015 оны Цагаан сарын барилдаанд Улсын аварга Ч.Санжаадамбад унан үзүүрлэж байжээ.
БАРИМТ 20
Улмаар тэр 2019 оны Урвуулагч хэмээх шороон гахай жилийн сар шинийн баярт зориулсан барилдаанд Ч.Санжаадамба, Н.Батсуурь, Ц.Содномдорж нарыг дараалуулан хаяж түрүүлсэн.
БАРИМТ 21
Тэрбээр Бөхийн өргөөнд нийт 30 удаа их шөвөгт үлдсэн ховор амжилтыг гаргажээ.
БАРИМТ 22
Түүнчлэн 17 удаа дунд шөвөгт шалгарсан байна.
БАРИМТ 23
Түүний хүү П.Билгүүндалай өнөө жилийн чөлөөт болон сонгомол бөхийн УАШТ-ээс алт, хүрэл медаль хүртсэн.
БАРИМТ 24
Бөхийн өргөөний хамгийн сүүлийн шөвөг нь 2025 оны 12 дугаар сарын 07-нд байв. Тодруулбал, Эх, хүүхдийн эрүүл мэндийн төвийн нэрэмжит хандивын барилдаанд шөвгарсөн.
Сэтгэгдэл (4)