БАРИМТ 1
Монголын Зохиолчдын эвлэлийн Хороо 1929 оны 1-р сарын 9-ний өдөр ”Хувьсгалч зохиолч нарын бүлгэм" нэртэй анх байгуулагдсан байна.
БАРИМТ 2
Их зохиолч Дашдоржийн Нацагдорж, Сономбалжирын Буяннэмэх нарын 1920-иод оны шалгарсан 17 сэхээтэн цуглаж, анхны хурлаа хийж, ”Хувьсгалч зохиолч нарын бүлгэм"-ийг 1929 оны нэгдүгээр сарын 9-ний өдөр байгуулан зорилго, чиглэлээ тодорхойлж, зохиолчдын бүлгэмийн удирдах зөвлөлийг байгуулан тэргүүлэгчдийг сонгон баталснаар жил бүрийн энэ өдрийг “Монголын зохиолчдын өдөр” болгон тэмдэглэж ирсэн уламжлалтай.
БАРИМТ 3
Монголын зохиолчид нэгдэж байгууллагаа байгуулсан 1929 ондоо багтааж, “Уран үгсийн чуулган” цоморлигийг 15 хүний 36 зохиолыг оруулж анх хэвлүүлж гаргасан нь утга зохиол, урлаг, соёлын түүхэнд цоо шинэ тэмдэглэлт үйл явдал болж байжээ.
БАРИМТ 4
Монголын зохиолчдын түүхт 90 жилийн ойгоор төрөөс Монголын Зохиолчдын эвлэлийг Хөдөлмөрийн гавьяаны улаан тугийн одонгоор шагнасан юм.
БАРИМТ 5
Монголын зохиолчдын байгууллага үүсэн байгуулагдсаны түүхт 93 жилийн ойн энэ онд зохиолчдын байгууллагыг олон жил удирдаж ирсэн, ХХ зууны манлай эмэгтэй зүтгэлтэн, Төрийн шагналт зохиолч С.Удвалын 100 жилийн ой болох юм.
БАРИМТ 6
Мөн Монголын Зохиолчдын эвлэлийн даргаар ажиллаж байсан их зохиолч С.Буяннэмэх болон зохиолч Д.Намдаг нарын мэндэлсний 100 жилийн ой өнгөрсөн онд тохиосон.
БАРИМТ 7
Монголын Зохиолчдын Эвлэл үүсэн бий болсон цагаас хойш Монголын олон зуун зохиолч тус байгууллагын гишүүнээр элсэж, амьдрал уран бүтээлээ холбосон байдаг.
БАРИМТ 8
Монголын Зохиолчдын эвлэлийн ойн хүрээнд МЗЭ-ийн удирдлага их зохиолч Д.Нацагдоржийн хөшөөнд цэцэг өргөн хүндэтгэл үзүүлдэг уламжлалтай.
БАРИМТ 9
Мөн жил бүр “Алтан Өд” оны шилдэг бүтээл шалгаруулах ёслолыг уламжлал болгон зохион байгуулдаг байна.
БАРИМТ 10
Түүнчлэн жил бүр оны шилдэг өгүүллэг шалгаруулах "Утгын чимэг", оны шилдэг шүлэг шалгаруулах "Болор цом" наадмыг зохион байгуулсаар ирсэн.
БАРИМТ 11
Монголын Зохиолчдын Эвлэлийг 1929 оноос 1933 онд Мөрдэндэвийн Ядамсүрэн, 1934-1935 онд Сономбалжирын Буяннэмэх, 1936-1937 онд Т.Сэнгэдорж, 1938-1942 онд Т.Дэнчингунгаа, 1943, 1954 онд Цэндийн Дамдинсүрэн, 1947-1948 онд Шадавын Лувсанвандан, 1948-1952 онд Шагдаржавын Нацагдорж удирдаж байв.
БАРИМТ 12
Улмаар 1953 онд Лувсандоржийн Тойв, 1955 онд Баярын Жаргалсайхан, 1956-1959 онд Дашзэвэгийн Сэнгээ, 1961-1974 онд Сономын Удвал, 1974-1975 онд Лодонгийн Түдэв, 1977-1990 онд Дожоогийн Цэдэв нар удирджээ.
БАРИМТ 13
Ардчилсан нийгмийн он жил эхлэхтэй зэрэгцэн 1990-1992 онд Дүгэржавын Маам, 1992-1993 онд Бавуугийн Лхагвасүрэн, 1993-1997 онд Долгорын Нямаа, 1997-2001 онд П.Баярсайхан /Д.Төрбат/ нар удирджээ.
БАРИМТ 14
Цаашлаад шинэ мянганы он жилүүдэд 2001-2008 онд Ц.Энхбат, 2009-2012 онд Х.Чилаажав, 2012-2015 онд Ц.Буянзаяа, 2017 онд А.Эрдэнэ-Очир, 2018 онд Долгорын Цэнджав, 2019 оноос Баярхүүгийн Ичинхорлоо нар удирдаж иржээ.
БАРИМТ 15
Гишүүдийн татвар 2022 он 60000 төгрөг, 2023 он 60000 төгрөг, 2024 он 120000 төгрөг, 2025 он 120000 төгрөг болжээ.
БАРИМТ 16
80-аас дээш настай ахмад гишүүдийн татварыг 2024 оноос 100 хувь чөлөөлсөн. Хөгжлийн бэрхшээлтэй гишүүдийн татвар 50 хувь хөнгөлөлттэй аж.
БАРИМТ 17
МЗЭ-ийг хамгийн олон жил удирдсан хүн бол XX зууны манлай эмэгтэй удирдагч,Төр нийгмийн нэрт зүтгэлтэн,Төрийн шагналт зохиолч С.Удвал билээ.
Сэтгэгдэл (1)