БАРИМТ 1
Эзэн Богд Чингис хаан: Алд бие минь алжааваас алжаатугай. Ахуй төр минь бүү алдартугай. Тайлбар: Улс орны тусгаар тогтнол нь хувь хүний эрх ашиг, амь биеэс ч илүү үнэтэй гэх санааг илэрхийлсэн бол Ардчилсан Намын үзэл баримтлалд “Үндэсний язгуур эрх ашиг, тусгаар тогтнолоо бататгах, өв уламжлалаа хамгаалах, хойч үедээ өвлүүлэх, үндэсний эв эеийг бэхжүүлнэ” хэмээн тусгасан байдаг билээ.
БАРИМТ 2
Их Монгол Улсын төрийн далбаа болон Ардчилсан намын далбаа. Тайлбар: Их Монгол Улсын далбаа нь тэнгэрийн ивээлтэй, нэгдмэл хүчийг илэрхийлдэг бол Ардчилсан намын далбаа нь эрх чөлөө, нээлттэй нийгэм, ил тод байдал, эв нэгдлийг илэрхийлнэ.
БАРИМТ 3
Соёмбо тэмдэг. Тайлбар: Соёмбо тэмдэг нь үндэсний эрх чөлөө, тусгаар тогтнол, ардчилал ба иргэний эрхийг бэлгэднэ. Ардчилсан Нам нь тусгаар тогтнол, үндэсний язгуур ашиг сонирхлыг эрхэмлэн, ардчилсан ёс, Үндсэн хуульт парламентын засаглалаа бататгана.
БАРИМТ 4
Ш.Галсандорж нарын Цагаан морин жилийн гараа бүтээл. Тайлбар: 1990 оны Цагаан морин жилийн гараа бүтээл бол Монголын ард түмэн эрх чөлөө, ардчиллыг энх тайван замаар эхлүүлснийг бэлгэдсэн түүхэн үзэл санааны бүтээл юм.
БАРИМТ 5
Цагаан шонхор шувуу. Тайлбар: Монгол хүн бүрийн заяагдмал эрх, эрх чөлөө, хувь заяаныхаа эзэн байхыг баталгаатай хамгаалж, чөлөөт нийгмийн зарчимд тулгуурласан үндэсний сэргэн мандлыг бэлгэдэв.
БАРИМТ 6
Морин хуур. Тайлбар: Эрх чөлөөт Монголчуудын ардчилсан төр нь ард түмнийхээ хүсэл зоригийн илэрхийлэл болон байгуулагдаж, цэвэр тунгалаг байхыг Монгол хүний сэтгэлийн гүнээс ундрах аялгууг хоёрхон чавхдаст багтаан эгшиглүүлдэг хосгүй өв морин хуураа бид “Ардчиллын гэрэг”-д хүндэтгэн залав.
БАРИМТ 7
Их Монгол Улсын цэрэг, армийн байлдан дагуулалтад шийдвэрлэх үүрэг гүйцэтгэсэн хамгийн чухал хэрэгсэл нь дөрөө байв. Тайлбар: Дөрөө нь Монголчуудад тэнцвэр, ялалтыг авчирсан бол Ардчилал нь иргэний оролцоо, тэгш боломжийг бий болгосон. Орчин үеийн Монголчууд бид мэдлэг, оюунаа хөгжүүлж, технологиор илүүрхэж дэлхийд өрсөлдөхийн чухлыг бэлгэдэж монгол дөрөөг Ардчиллын гэрэгэ-ээд шигтгэв.
БАРИМТ 8
Ардчиллын гэрэгэ-гийн утга агуулга: Монгол гэр Тайлбар: Монгол хүн өвөг дээдсийнхээ болон өөрийн бүтээснээр бахархаж, эх хэл, соёл, уламжлал, гэр бүлийнхээ үнэт зүйлсийг нандигнан хамгаалж, өвлүүлэн бэхжүүлэхийг бэлгэдэв.
БАРИМТ 9
Мэгжид Жанрайсиг бурхан. Тайлбар: 1911 онд Монголчууд тусгаар тогтнолоо сэргээсний дараа Мэгжид Жанрайсиг бурхныг ард түмний хандиваар босгосон ч коммунизмын үед устгасан. 1990 оны дараа Ардчилсан хувьсгал ялахад ард түмэн дахин босгосон түүхтэй. Хүн бүр өөрийн итгэл үнэмшилтэй, шашин шүтэх, эс шүтэх эрх чөлөөтэй байж эв найрсгаар зэрэгцэн амьдрах орчныг Ардчилал дархлан хамгаална.
БАРИМТ 10
Төрийн есөн хөлт цагаан туг. Тайлбар: Төрийн есөн хөлт цагаан тугийг Монгол төрийн сүр хүч, тусгаар тогтнол, эв нэгдлийн бэлгэдэл хэмээдэг. Тиймээс үйлст нэгт ардчилагчид бид өнгөрсөн, өнөө, ирээдүй гурван цагийн хэлхээнд аж төрж, түүхээсээ суралцаж, ирээдүй үеэ гэрэлтүүлэх үүрэг хариуцлагаа бүрнээ ухамсарлана.
БАРИМТ 11
Ганцхан Монгол Улсад ургадаг Алтанхундага цэцэг. Тайлбар: Ардчилал хувийн өмч, чөлөөт зах зээлд суурилсан эдийн засгийн тогтолцоог хөгжүүлж, дэлхийн тавцанд бүтээлчээр өрсөлдөнө.
БАРИМТ 12
Бурхан Халдун уул. Тайлбар: Цагаан морин жилийн Ардчилсан хувьсгалын түүхэн ач холбогдлыг өндөрт өргөж, Үндсэн хуулиа дээдлэн сахиж, ард түмний төлөөлөл бүгд хэлэлцэн шийддэг парламентын тогтолцоогоо бэхжүүлэхийн төлөө байна.
