ЭШЛЭЛ 1
Арав гаруй жилийн дараа намынхаа бүх хаалга, цонхыг цэлийтэл нээж шинэ салхи оруулан Ардчилсан нам бол өсөж хөгждөг, өөрчлөгдөж шинэчлэгддэг амьд организм болохоо харуулсан маань бидний ололт юм.
ЭШЛЭЛ 2
Нээлттэй, цэгцтэй гэдэг бол уриа үг төдий биш. Энэ бол Ардчилсан намын ч, Монгол улсын ч цаашид барих үзэл санаа, үйл хэрэг юм.
ЭШЛЭЛ 3
Эмх замбараагүй, хөл толгойгүй гэх шүүмжлэл бас та биднийг дагадаг. Үүнийг өөрчилж, намаа эмх цэгцтэй, хариуцлагатай институт болох эхний алхмууд хийгдэж байна.
ЭШЛЭЛ 4
Сөрдөг сөрөг хүчин биш бодит шийдэлтэй, засаглахад бэлэн нам болох эхний алхмууд хийгдлээ.
ЭШЛЭЛ 5
Намаа шинэчилсний дараах бидний зорилго бол Монголоо шинэчлэх явдал билээ.
ЭШЛЭЛ 6
Ашигт малтмалын нөөц баялгийг хувааж идэж, хусмаар нь сонгуулийг худалдаж авдаг улс төрийн бүлэглэл 10 гаруй жил хяналтгүйгээр төрийг барьсан болохыг бид өнөөдөр тэдний дотоодын тэмцлээс харж байна.
ЭШЛЭЛ 7
Ардын намын дарга нар авилгалыг энгийн хэм хэмжээ болгож, “Би их идсэн, чи бүр их идсэн” гэж эрээ цээргүйгээр ил цагаан ярьцгаадаг боллоо.
ЭШЛЭЛ 8
Төгрөгөөр биш доллараар, саяар биш тэрбум, их наядаар тэдний хулгай хэмжигдэж байна. Эх орны баялагийг төрийн нэрээр нийгэмчилж, иргэдэд очих ёстой хэсгийг эх орончийн, даргын нэрээр хувьдаа завшжээ.
ЭШЛЭЛ 9
Энэ 10 жилд иргэдэд эдийн засгийн өсөлт очоогүй. Бизнесүүдийн орлого ашиг өсөөгүй.
ЭШЛЭЛ 10
Ардын амьдрал уруудсан, даргын тансаглал хэтэрсэн 10 жил аанай өнөөдөр ч үргэлжилж байна.
ЭШЛЭЛ 11
Тэлсэн, томорсон төсөв, төржсөн эдийн засгийн зарцуулалтаас ил тод байдлыг, иргэний болоод сөрөг хүчний хяналтыг авахын тулд эрх баригчид алхам бүрээ нууцлах хуулийн хулгайг хийж даджээ.
ЭШЛЭЛ 12
Авлигын гинж нь тасарвал бүгдээрээ, намаараа унах тул хүссэн ч, эс хүссэн ч тэд гар гараасаа атган өмнөх хулгай, худлаа нуухаар нэгдэж байгааг саяхны үйл явдлууд харуулж байна.
ЭШЛЭЛ 13
Монголоо сонгохуу, намаа сонгохуу гэдэг сонголтоос тэд үргэлж намаа сонгосоор ирсэн түүхтэй.
ЭШЛЭЛ 14
Ардын нам бол өмнөх даргаа буруугаар будаж, буудах бол буудаж хаяад дараагийнхыг нь баатраар тодруулдаг тогтсон уламжлалтай нам.
ЭШЛЭЛ 15
Үнэндээ өнгөрсөн 10 жилд авлига, хулгай л цэцэглэн хөгжснөөс өөр юу ч Монголд өөдлөн дээшилсэнгүй ээ.
ЭШЛЭЛ 16
Ардчилсан намын сонголт бол дуугүй сууж хамтрах биш хүчтэй цөөнх байж хянах, даган дуурайх биш тэмцэх, дасан зохицох биш шинэчлэх явдал юм.
ЭШЛЭЛ 17
Бид 36 жил тэмцээд тэмцээд дангаараа олонх болсонгүй, дараалан ялсан ч үгүй, давхарлан бүх шатанд ялаа ч үгүй гэх “бодит” үнэн бас бий.
ЭШЛЭЛ 18
Өнөөдрөөс эхлэн Ардчилсан Монголын шинэ тэмүүллийг бид тунхаглаж байна.
ЭШЛЭЛ 19
Эдийн засгийн өсөлтийг өнөөгийнхөөс 2 дахин хурдасгаж хөгжлийн эрчим, хүртээмжээ нэмэгдүүлье.
ЭШЛЭЛ 20
Үүний тулд дараагийн сонгуулиар Ардчилсан нам ялах ёстой. Ялахын тулд парламент дахь Ардчилсан намын суудлыг 2 дахин олон болгож, 84 гишүүнтэйгээр үнэмлэхүй ялах ёстой.
ЭШЛЭЛ 21
Ардчиллын шинэ тэмүүллийн суурь нь Шударга ёс юм. Шударга ёс зөвхөн үг биш. Шударга ёс бол эрх мэдлийн тэнцвэр.
ЭШЛЭЛ 22
2027 оны Ерөнхийлөгчийн сонгууль бол хуульт ёсыг сэргээх, ардчиллын институцийг аврах чухал тулаан байх болно.
ЭШЛЭЛ 23
Бид ялна. Ялах ёстой. Ялахын төлөө нэгдэх болно.
ЭШЛЭЛ 24
Ерөнхийлөгчийн сонгуулийн ялалтын эрчээрээ бид 2028, цаашлаад 2032, 36 онуудын УИХ, орон нутгийн сонгуулиудад дараалсан, давхар ялалтуудыг байгуулж Шинэ Монголоо бүтээнэ.
