Ашигт малтмал, газрын тосны газрын дарга П.Баянбаатар өчигдөр шатахууны нийлүүлэлттэй холбоотой асуудлаар мэдээлэл хийхдээ, "Долоодугаар сард иргэд дөрвөн сарын хэрэглээтэй тэнцэх хэмжээний бензин авсан. Одоогийн байдлаар бүх шатахуун түгээх станц хэвийн ажиллаж байгаа учраас иргэдийг шатахуунаа ердийн хэрэгцээнийхээ хэмжээнд авахыг хүсэж байна" хэмээн мэдэгдсэн. Түүний энэхүү байр суурь олон нийтийн дунд хүчтэй шүүмжлэл дагуулж, цахим орчинд бухимдал өрнүүлэхэд хүргээд байна.

П.Баянбаатар нь АМГТГ-ын даргын албыг хашиж эхлээд нэг жил орчим болж байгаа ч түүний томилгоотой холбоотой хууль эрх зүйн маргаан өнөөдрийг хүртэл үргэлжилсээр байгаа юм.

Төрийн албаны зөвлөлөөс хийсэн шалгалтаар түүнийг төрийн жинхэнэ албаны удирдах албан тушаалд хууль зөрчин томилсон гэж үзэж, энэ талаар Аж үйлдвэр, эрдэс баялгийн сайд Г.Дамдиннямд "Хууль хэрэгжүүлэх тухай" албан бичиг хүргүүлжээ. Баянбаатар нь Батсүмбэрэлийг Чингэлтэй дүүргийн Засаг даргаар ажиллаж байхад Тамгын газрын даргаар нь томилогдон ирж байсан дотнын найз нь юм. Түүнийг АМХЭГ-ын даргаар томилогдоход Н.Батсүмбэрэл гишүүн нөлөөлсөн хэмээгдэж байв.

    Мөн Төрийн албаны зөвлөлөөс томилгоотой холбоотой зөрчлийг 2026 оны тавдугаар сарын 1-ний дотор арилгах үүрэг өгсөн ч шаардлага биелээгүй тул холбогдох хууль бус томилгооны шийдвэрийг хүчингүй болгох тухайгаа мэдэгдсэн байна.

Өөрөөр хэлбэл, эрх бүхий байгууллага П.Баянбаатарын томилгоог хууль зөрчсөн гэж дүгнэж, холбогдох байгууллагад удаа дараа шаардлага хүргүүлсэн ч өнөөдрийг хүртэл шийдвэрлээгүй хэвээр байгаа аж. Ийм нөхцөлд тэрбээр Засгийн газрын мэдээллийн индэр дээрээс шатахууны хэрэглээтэй холбоотой дээрх мэдэгдлийг хийсэн нь олон нийтийн шүүмжлэлийг улам нэмэгдүүлээд байна.

П.Баянбаатар өмнө нь Чингэлтэй дүүргийн Засаг даргын Тамгын газрын дарга, Чингэлтэй дүүргийн Иргэдийн Төлөөлөгчдийн Хурлын нарийн бичгийн дарга, мөн "Шихихутаг" их сургуульд багшаар ажиллаж байсан юм.

Л.Баяр