МУГТ, уулын спортын олон улсын хэмжээний мастер Б.Гангаамаа Улсын онцгой комиссын хуралд оролцлоо. Хурлын дараа сэтгүүлчдийн асуултад хариуллаа.
-Нөхцөл байдлыг хэрхэн харж байна вэ?
- Отгонтэнгэр ууланд Монголын уулчид авиралт хийгээд 60-аад жил болж байгаа. Нөхцөл байдлын хувьд одоо авиралт хийх улирал биш. Цас ороод хатуураагүй байгаа. Тийм учраас цасан нуранги үүсэх магадлал маш өндөр.
Эрсдлийн байдлыг үзэхэд тэд маань хоёр хоночихлоо. 10 дугаар сарын сүүл болсон байна. Цаг агаар маш их хүйтэрсэн байгаа. Ямар нэгэн бэртэл гэмтэл авсан бол тэд ямар ч майхан савгүй, хоол хүнсгүй байгаа болохоор маш их хүндрэл үүссэн байгаа болов уу. Би яг нөхцөл байдал дээр очиж хараагүй болохоор сайн мэдэхгүй байна. Оргилд гарсан хугацаа 16,30 цаг гэхээр дэндүү орой байна. Цас нурахыг тэр болгон урьдчилж таамаглах боломжгүй. Гэхдээ өдийд цас нурах үе мөн үү гэвэл мөн. Би нэг л юманд харамсаж байна. Яах гэж тэгж олуулаа нэг олсонд орж, энэ эрсдэлтэй улиралд нь явсан юм бол доо гэдэгт харамсаж байна. Амьд байвал тэднийг яаралтай аврах хэрэгтэй байна.
-Ер нь өндөр эрсдэлтэй байна гэж үзэж байна уу?
- Цас яг аль тал руугаа нурсан гэдгийг нь мэдэхгүй байна. Хавцал руу унасан бол маш эрсдэлтэй. Харин бууж байгаа тал руугаа нурсан бол бэртэж, гэмтчихээд амьд байх магадлал байгаа гэж үзэж байна. Байгалийн давагдашгүй хүчин зүйл гэж хэлж байгаа ч цас нурсан тохиолдолд хэрвээ амьд мэнд үлдсэн хүн байвал хэн нэгэн нь бусдадаа туслах боломжтой байж болно. Гэхдээ бууж байх үед осол гарсан болохоор өмссөн хувцас, жижиг үүргэвчтэйгээ, ус байвал уугаад дуусгачихсан. Хүнс байвал идээд дуусгасан байгаа. Тэгэхээр бие биенийгээ үүрээд явж чадахгүй нөхцөл үүссэн байх.
-Багийг ахлаж явсан Н.Сүрэнжав гэх уулчны талаар?
- Н.Сүрэнжав гэдэг хүн Уул аялалын клубуудын нэгдсэн холбоог тэргүүлдэг хүн нь гэж би ойлгож байгаа. Туршлагын хувьд би сайн мэдэхгүй байна. Цас нурна гэж урьдчилан тооцоолох боломжгүй болохоор тэр хүнийг буруутгах боломжгүй. Өөрөө ч сураггүй болсон хүмүүсийн дунд яваа.
- Отгонтэнгэр хайрхан ямар замаар авиралт хийдэг вэ?
-Авиралтын үндсэн зам нь ар буюу өмнө талаасаа авирдаг. Саяны багийнхан өвөр талаасаа явсан байсан. энэ нь зам нь хад дуусаад цас эхлэх үедээ огцомдуу. Яг тэр огцом бөмбөгөр дээр цас хуралдсан бол нуранга буух магадлал өндөр.
-Сая та Онцгой байдлын онцгой комиссын хуралдаанд орлоо?
- ОБЕГ боломжийн хэрээрээ маш шуурхай арга хэмжээ зохион байгуулж байна. эрэх хайх ажиллагаанд хамгийн түрүүнд Завхан аймгаас 5 уулчин явсан. Баян-Өлгий, Ховд аймгаас Гавьяат уулчин Т.Гүррагчаагаар ахлуулсан уулчид, Улаанбаатараас Гавьяат уулчин Г.Өсөхбаяраар ахлуулсан 5 уулчин, Эрдэнэтээс н.Бат-эрдэнээс ахлуулсан Онцгой байдлынхантай нийлээд явж байгаа.
Сэтгэгдэл (10)