Дундговь аймгийн Гурвансайхан сумын нутаг дэвсгэрт байх Салхитын мөнгөний ордтой холбоотой асуудлаар нэр бүхий шүүгч нарт холбогдох хэргийн шүүх хурлын тов гарсан ч шүүгчдэгч шүүгчээс татгалзсан учир шүүх хурал хойшлоод буй. Тэгвэл уг хэргийн холбогдогчоор ГИХГ-ын дэд дарга асан Б.Цолмон, Хан-Уул дүүргийн цагдаагийн хэлтсийн тасгийн дарга Г.Алтан-Очир, ШШҮХ-гийн Криминалистикийн шинжилгээний газрын дарга, дэд хурандаа Д.Адилбаяр нарыг яллагдагчаар татаж, хэргийг шүүхэд шилжүүлсэн юм. 

Эрүүгийн хэрэг хянан шийдвэрлэх тухай хуулийн 15.1 дүгээр зүйлийн 1 дэх хэсэгт “Эрүүгийн хэрэг хянан шийдвэрлэх ажиллагаанд оролцогч өөрийн эрх, хууль ёсны ашиг сонирхлоо хамгаалуулах тухай хүсэлтийг шүүх, прокурор, мөрдөгчид гаргах эрхтэй.”, 15.2 дугаар зүйлийн 1 дэх хэсэгт “Хүсэлт, гомдлыг эрүүгийн хэрэг хянан шийдвэрлэх ажиллагааны аль ч үед гаргаж болно.” гэж заасан байдаг.

Шүүхэд шилжүүлсэн уг хэрэгт Д.Адилбаяр, Б.Цолмон болон тэдний өмгөөлөгч нараас Эрүүгийн хэрэг хянан шийдвэрлэх тухай хуулийн 33.1 дүгээр зүйлийн 6.6 дахь заалтад заасан эрхийнхээ хүрээнд хэргээ хялбаршуулсан журмаар хянан шийдвэрлүүлэх хүсэлт гаргасан байна.

Энэ дагуу прокуророос тэдэнд торгох ял оногдуулах санал гаргасан бөгөөд шүүгдэгч нар нь прокурорын торгох ялын саналыг хүлээн зөвшөөрчээ.

Ийнхүү хэргээ хялбаршуулсан журмаар шийдвэрлүүлэх хүсэлт болон прокуророос торгох ял оногдуулах санал тус тус гаргасны дагуу шүүхээс хэргийг энэ сарын 3-ны өдөр хянан шийдвэрлэжээ. Тодруулбал, шүүгдэгч нарыг гэмт хэрэг үйлдсэн гэм буруутайд тооцож, торгуулийн ял оногдуулж шийдвэрлэсэн байна.

Өөрөөр хэлбэл, шүүх Эрүүгийн хэрэг хянан шийдвэрлэх тухай хуулийн 17.4 дүгээр зүйлийн 5 дахь хэсэгт “...прокурорын саналын хүрээнд шүүгдэгчийн эрх зүйн байдлыг дордуулахгүйгээр эрүүгийн хариуцлага хүлээлгэх тухай шийдвэр гаргана” гэж заасны дагуу шүүгдэгч нарт торгуулийн ял оногдуулсан аж. 

Шүүхийн захирамжийн дагуу шүүгдэгч Д.Адилбаярын нийтийн албанд ажиллах томилогдох эрхийг дөрвөн жилээр хасаж, 18 сая төгрөгөөр, шүүгчдэгч Б.Цолмонд нийтийн албанд томилогдох эрхийг хоёр жилээр хасаж, 13.5 сая төгрөгөөр торгох ял оноосон байна. 

Түүнчлэн Д.Адилбаяраас 35 сая төгрөг, Б.Цолмонгоос таван сая төгрөг тус тус гаргуулж, улсын орлого болгуулахаар шийдвэрлэжээ. 

Ташрамд дурдахад, нийслэлийн Прокурорын газраас ШШҮХ-гийн Криминалистикийн шинжилгээний газрын дарга асан, дэд хурандаа Д.Адилбаяр, ГИХГ-ын дэд дарга асан Б.Цолмон нарт Эрүүгийн хуулийн 22.4.4, 22.5.1-д зааснаар яллах дүгнэлт үйлдэн хэргийг Хан-Уул дүүргийн Эрүүгийн хэргийн анхан шатны шүүх 2020 оны нэгдүгээр сарын 06-ны өдөр шилжүүлсэн юм.

Г.Маргад