БАРИМТ 1
О.Хангай нь 1990 оны аравдугаар сарын 02-нд Ховд аймгийн Буянт суманд төрсөн. 36 настай.
БАРИМТ 2
Биеийн 186 см, 138 кг жинтэй.
БАРИМТ 3
Түүний аав Оргих улсын аварга тариаланч, ээж Баярлах нь нярав.
БАРИМТ 4
Ээж, аавын хоёр талаасаа бөхийн удамтай. Түүний ээжийг Засагт ханы хөх харчуудын нэг, алдарт Шаравын Батсуурь аваргын удмын хүн гэдэг.
БАРИМТ 5
О.Хангай айлын ганц хүү. Гурван охин дүүтэй.
БАРИМТ 6
Ховд аймгийн Манхан сумын харьяат Н.Дэлгэртуяа гэх бүсгүйтэй гэрлэсэн. Тэд арван жилдээ танилцаж, оюутан болоод үерхэж эхэлжээ.
БАРИМТ 7
Дунд сургуульд байхдаа волейбол тоглодог байсан бөгөөд аймаг, бүсийн тэмцээнд амжилттай оролцож явсан.
БАРИМТ 8
ХААИС-ийн Газар зохион байгуулалтын ангийг төгссөн.
БАРИМТ 9
Түүний бөхийн замнал 2010 онд хожуу эхэлжээ. Тухайн жил ХААИС-ийн төгсөх ангийн оюутан байсан тэрбээр сумынхаа наадамд ямар ч бэлтгэлгүйгээр барилдаж үзүүрлэн сумын начин цолыг хүртсэн гэдэг.
БАРИМТ 10
Түүний анхны багш бол Б.Адъяахүү. Гараа дэвээ, барилдааны анхан шатны мэдэгдэхүүн заалгаж байжээ. Харин өдгөө Ховд бөхийн дэвжээнд Ц.Мягмарсүрэн зааны удирдлага дор бэлтгэл сургуулилтаа хийдэг.
БАРИМТ 11
2012 онд аймгийнхаа наадамд барилдахдаа үзүүр түрүүнд аймгийн арслан Н.Батсайхантай барилдаж, үзүүрлэн Аймгийн заан цол хүртсэн. Тэрбээр сүүлд хэвлэлд өгсөн ярилцлагадаа "Тэр үед аймгийн заан цол хүртээд тууштай барилдвал амжилтад хүрэх юм байна гэж итгэл төрсөн. Үндэсний бөхтэй амьдралаа салшгүй холбосноо 2012 онд мэдэрсэн" гэжээ.
БАРИМТ 12
О.Хангай нь допингийн асуудлаар хүчтэй дуугарсаар ирсэн. 2020 онд “Хэрвээ Э.Оюунболдыг Цагаан сарын барилдаанд зодогловол би барилдахгүй. Би ганцхан Э.Оюунболдтой тэмцээгүй. Нэр бүхий 37 бөхийн нэрийг зарлуулж, допингтой холбоотой бугшсан идээ бээрийг шахаж, үндэсний бөхийн спортоо ирээдүй хойчдоо өвлүүлж үлдээхийг хүсэж байна” гэж байв.
БАРИМТ 13
Тэр бол Ховд аймгаас төрсөн анхны "Улсын аварга" цолтон
БАРИМТ 14
2018 онд ӨМӨЗО-д зохион байгуулагдсан “Алтан бүс” олон улсын барилдаанд түрүүлж алтан бүсийн эзэн болж байлаа.
БАРИМТ 15
"Аврагч" спорт хороо, Од групп, Эм Жи Өү Транс ХХК, Зорчигч Тээвэр 1 ОНӨААТҮГ-ын нэр дээрээс барилдаж байна.
БАРИМТ 16
Тэрбээр анхны цолоо 2010 онд Буянт сумын наадамд зодоглож Сумын начин цол хүртэж байсан бол 2012 онд Аймгийн заан, 2013 онд Аймгийн арслан цолыг хүртжээ.
БАРИМТ 17
Ардын хувьсгалын 96 жилийн ойн улсын баяр наадамд улсын заан Б.Пүрэвсайханаар дөрөв, улсын арслан Э.Оюунболдоор тав, аймгийн арслан Б.Сериктай тунан барилдаж, зургаа даван шөвгөрч "Улсын харцага" цолыг хүртсэн.
БАРИМТ 18
Ардын хувьсгалын 98 жилийн ойн баяр наадамд аймгийн арслан М.Бямбадоржоор дөрөв давж, тавын даваанд улсын начин Д.Цэрэнтогтоход өвдөг шороодсон. 2019 онд улсын начин Д.Цэрэнтогтох сэргээш хэрэглэсэн байсан тул Ардын хувьсгалын 99 жилийн ойн баяр наадмын дараахан давааг нь нөхөн олгож чимэг нэмсэн.
БАРИМТ 19
Тэрбээр улсын аварга цол хүртэхдээ дараах бөхчүүдийг давжээ. Нэгийн даваанд Тува улсын бөх Куулар Мөнх-Эрдэнэ, хоёрын даваанд Ховд аймгийн начин М.Баяржавхлан, гурвын даваанд Төваймгийн харцага Т.Батсайхан, дөрвийн даваанд Дорнод аймгийн арслан Б.Батдорж, тавын даваанд Төв аймгийн арслан Г.Өсөхбаяр, зургаагийн даваанд Ховд Аймгийн харцага Б.Сосорбарам, долоогийн даваанд Улсын начин О.Мөнх-Эрдэнэ, наймын даваанд Улсын аварга С.Мөнхбат, есийн даваанд Улсын аварга П.Бүрэнтөгс, арвын даваанд улсын харцага Б.Орхонбаяр.
БАРИМТ 20
Тэрбээр Сар шинийн барилдаанд хоёр жил дараалан түрүүлсэн.
БАРИМТ 21
Мөн 2014, 2017, 2026 онуудад гурван удаа үзүүр булаагаад байна.
БАРИМТ 22
Тэрбээр аймгийн цолтойдоо бөхийн өргөөнд таван удаа түрүүлсэн.
БАРИМТ 23
Цагаан сарын барилдаанд аймгийн цолтойдоо хоёр удаа үзүүрлэсэн ганцхан бөх байдаг нь Улсын аварга О.Хангай юм.
БАРИМТ 24
Тэрбээр Бөхийн өргөөнд 44 дэх удаагаа түрүүллээ.
