2026 оны хөлбөмбөгийн дэлхийн аварга шалгаруулах тэмцээний шөвгийн 16-гийн тоглолтууд өндөрлөж, цомын төлөө өрсөлдөх шилдэг найман баг тодорлоо. Энэ удаагийн шөвгийн наймд Аргентин, Франц, Испани, Англи, Бельги, Марокко, Норвеги, Швейцарын шигшээ багууд шалгарсан бөгөөд тэд дэлхийн аваргын төлөөх өрсөлдөөнөө үргэлжлүүлэхээр байна.

Дэлхийн аварга Аргентин Египетийг 0:2-оос гайхалтай эргэн ирж 3:2-оор буулган авснаар дараагийн шатанд шалгарсан бол Франц Парагвайг, Марокко Канадын шигшээг тус тус хожлоо. Мөн Испани Португалыг, Бельги АНУ-ыг буулган авч шөвгийн наймд шалгарсан юм.

Нөгөө хэсэгт Норвеги таван удаагийн аварга Бразилыг 2:1-ээр буулган авч томоохон сенсаац дэгдээсэн бол Англи Мексикийг 3:2-оор хожив. Харин Швейцар Колумбитай үндсэн болон нэмэлт цагт гоолгүй тэнцсэний эцэст торгуулийн цохилтоор 4:3-аар ялалт байгуулжээ. Шөвгийн наймын шатанд Франц – Марокко, Испани – Бельги, Норвеги – Англи, Аргентин – Швейцарын шигшээ багууд хоорондоо учраа таараад байна.

Шөвгийн наймд шалгарсан багуудыг дэлхийн аварга Лионел Мессигээр ахлуулсан Аргентиныг Лионел Скалони, Францыг Килиан Мбаппе, дасгалжуулагч Дидье Дешам, Испанийг Альваро Мората, дасгалжуулагч Луис де ла Фуэнте, Английг Харри Кейн, дасгалжуулагч Томас Тухель удирдаж байна.

Мөн Мароккогийн ахлагчаар Ашраф Хакими, ерөнхий дасгалжуулагчаар Валид Реграги, Бельгийн ахлагчаар Кевин Де Брюйне, дасгалжуулагчаар Руди Гарсия, Норвегийн ахлагчаар Мартин Эдегор, дасгалжуулагчаар Столе Сольбаккен, Швейцарын ахлагчаар Гранит Жака, ерөнхий дасгалжуулагчаар Мурат Якин ажиллаж байна. Дэлхийн аваргын шөвгийн наймын тоглолтууд долоодугаар сарын 10-12-ны өдрүүдэд болж, хагас шигшээд өрсөлдөх дөрвөн баг тодрох юм.

Л.Баяр