Пуэрто-Рикогийн мэргэжлийн боксчин Причард Колон 33 насандаа таалал төгслөө. Түүний нас барсан тухай мэдээг эцэг, дасгалжуулагч Ричард Колон наймдугаар сарын 13-нд олон нийтэд мэдээлжээ. Колоны амьдрал, спортын замнал 2015 оны аравдугаар сарын 17-нд болсон тулааны дараа орвонгоороо өөрчлөгдсөн юм. Тэрээр АНУ-ын Виржиниа мужийн Фэйрфакс хотод Террел Уильямстай тулалдах үеэр толгойн ар хэсэгт хэд хэдэн хууль бус цохилт авсан. Улмаар тулааны дараа бие нь муудаж, хувцас солих өрөөнд ухаан алдан унажээ. Эмнэлэгт хүргэгдэн тархинд цус харвалт, хүнд гэмтэл авсан нь тогтоогдож, яаралтай мэс засал хийлгэсэн байна.
Тэр 221 хоног комд байсан бөгөөд сэрснийхээ дараа ч тархины хүнд гэмтлийн улмаас бие даан амьдрах боломжгүй болж, гэр бүлийнхний байнгын асаргаанд оржээ. Колон алхаж, хэвийн ярьж чадахгүй болсон ч олон жилийн турш нөхөн сэргээх эмчилгээ хийлгэж, гэр бүлийнхэн нь түүнийг асарч ирсэн байна.
Харин мэргэжлийн боксын замналынхаа эхэнд Колон ирээдүйтэй тамирчдын нэгт тооцогдож байв. Тэрбээр 2013 онд мэргэжлийн бокст хөл тавьж, дараалан 16 ялалт байгуулсан бөгөөд эдгээрийн 13-ыг нь нокаутаар дуусгажээ. 2015 онд Уильямстай хийсэн тулаан түүний мэргэжлийн карьерын анхны ялагдал болсон бөгөөд харамсалтайгаар түүний спортын замналыг төдийгүй амьдралыг нь өөрчилсөн юм.
Колоны түүх олон жилийн турш боксын спортын аюулгүй байдлын асуудлыг хөндөж ирсэн. Түүний тулааны үеэр толгойн ар хэсэгт хууль бус цохилт өгсөн асуудал, шүүгч болон эмнэлгийн багийн ажиллагаа олон нийтийн анхаарлыг татсан юм. Колоны гэр бүл 2017 онд холбогдох талуудын эсрэг 50 сая ам.долларын нэхэмжлэл гаргаж байсан тухай мэдээлэл бий.
Колоны нас барсан мэдээний дараа боксын ертөнцийн байгууллагууд эмгэнэл илэрхийлжээ. Дэлхийн боксын байгууллага түүнийг “ринген дээрх төдийгүй амьдралынхаа хамгийн хүнд тулаанд тэсвэр хатуужлаа харуулсан” тамирчин хэмээн дурссан байна. Причард Колон мэргэжлийн боксын дэвжээнд богино хугацаанд гялалзсан ч 2015 оны эмгэнэлт тулаанаас хойших 11 жилийн амьдрал нь түүнийг спортын ертөнцөд тэсвэр хатуужил, гэр бүлийн хайр халамжийн бэлгэ тэмдэг болгосон юм.
Л.Баяр
