БАРИМТ 1
Тэрбээр 2004 оны хоёрдугаар сарын 16-нд мэндэлжээ. 22 настай.
БАРИМТ 2
"Хилчин" спорт хороо, Завхан Даян дэвжээ, Топ Нобел Тур ХХК, Миг Группын бөх.
БАРИМТ 3
Биеийн өндөр 184 см, биеийн жин 115 кг.
БАРИМТ 4
Завхан аймгийн Баянхайрхан сумын уугуул.
БАРИМТ 5
2022 оноос залуу бөхийн хувиар Сумын заан цолтой болон залуу бөхчүүдийн ээлжит барилдаанд зодоглож эхэлсэн.
БАРИМТ 6
Тэрбээр 2022 оны арванхоёрдугаар сард болсон Сумын заануудын ээлжит барилдаанд дөрөв давж байжээ.
БАРИМТ 7
2023 онд Завхан аймгийнхаа баяр наадамд тав давж Аймгийн начин цолны болзол хангасан. Тэгэхдээ тэр Улсын начин Г.Баасандоржийг хаясан байна.
БАРИМТ 8
Тэрбээр өнгөрсөн тавдугаар сард болсон Баянзүрх хайрханы хишиг барилдаанд Улсын цолтнуудтай үнэн хүчийг үзэн тав давсан. Ингэхдээ тэр нэгийн даваанд Улсын заан Б.Пүрэвсайханыг, хоёрын даваанд Улсын заан Б.Батмөнхийг, гурвын даваанд Улсын начин Б.Бадамсүрэнг, дөрвийн даваанд Улсын заан Д.Анарыг, тавын даваанд Улсын начин Б.Сосорбарамыг тус тус хаясан. Улмаар зургаагийн даваанд Улсын харцага О.Мөнх-Эрдэнэд унажээ.
БАРИМТ 9
Өнөө жилийн Бүх цэргийн баяр наадамд дөрөв давж, тавын даваад Хөвсгөл аймгийн арслан П.Хүрэлбаатарт өвдөг шороодсон.
БАРИМТ 10
Тэрбээр өнөө жилийн Улсын баяр наадамд урамтай сайхан барилдаж Аймгийн начин цолноос шууд Улсын заан цолонд хүрлээ.
БАРИМТ 11
Улсын заан цолонд хүрэхдээ тэр нэгийн даваанд Аймгийн харцага М.Анхбаярыг, хоёрын даваанд Улсын начин Н.Мустафаг, гурвын даваанд Улсын начин Э.Ванданцэрэнг, дөрвийн даваанд Улсын аварга О.Хангайг, тавын даваанд Улсын заан Б.Серикийг, зургаагийн даваанд Аймгийн хурц арслан Н.Амгаланбаатарыг, долоогийн даваанд Улсын арслан Э.Оюунболдыг тус тус хаясан. Улмаар наадмын түрүү бөх Б.Орхонбаярт унасан юм.
БАРИМТ 12
Түүний энэ амжилт нь Аймгийн начнаас Улсын заан хүрсэн нь хоёр дахь тохиолдол юм.
БАРИМТ 13
21 насандаа улсын заан болсон анхны бөх нь даяар дурсагдах, далай даян, дархан аварга Бадмаанямбуугийн Бат-Эрдэнэ юм. Тэрбээр 1986 онд 21 насандаа улсын заан цол хүртэж байсан.
БАРИМТ 14
Мөн тэрбээр Аймгийн начин цолноос Улсын харцага цолны давааг давсан хоёр дахь хүчтэн юм. Түүнээс өмнө Улсын харцага Л.Пүрэвжав энэ амжилтыг үзүүлж байлаа.
БАРИМТ 15
Тэрбээр Баянхайрхан сумаасаа төрөн гарсан анхны Улсын заан цолтон билээ.
БАРИМТ 16
Харин Баянхайрхан сумаасаа тодорсон гурав дахь улсын цолтон болж байна. Түүнээс өмнө энэ сумаас 1933 онд Д.Сэдбазар, 2015 онд Г.Баасандорж нар Улсын начин цолны болзол хангаж байв.
БАРИМТ 17
Тэр бол Завхан аймгаас төрөн гарч байгаа 13 дахь Улсын заан юм.
БАРИМТ 18
Тэр мөн Завханаас төрөн гарсан Сундуйжав нэртэй хоёр Улсын зааны нэг болж байна. Тэртээ 1932 онд Дашийн Сундуйжав нэртэй Завхан аймгийн Нөмрөг сумын уугуул хүчтэн Улсын заан болж байжээ.
БАРИМТ 19
Түүний нэрийн утга нь Монголоор "сүр хүч, жавхлан төгс" гэх утгыг илэрхийлнэ.
БАРИМТ 20
Тэр бол шинэ мянганы бөхчүүдээс Улсын заан болсон анхны хүн. Шинэ мянганыхнаас Э.Батмагнай анхны улсын цолтон болж байв.
БАРИМТ 21
Тэрбээр өсвөр, залуучуудын УАШТ-д бүгдэд нь түрүүлсэн гоц амжилтын эзэн.
БАРИМТ 22
Тэр өнөө жилийн улсын баяр наадмаар Н.Амгаланбаатар, Э.Оюунболд нарын өсвөр, залуучуудын Улсын аварга болж байсан бөхчүүдийг хаяж цол ахисан ч ДЭД аварга болж байсан Б.Орхонбаярт өвдөг шороодсон.
БАРИМТ 23
Тэрбээр Завхан аймгийн Идэр сумын харьяат "Урт гарт" хэмээх Маамын Лхагвын удмын бөх ажээ.
БАРИМТ 24
Маамын Лхагвын төрсөн ах М.Намбар нь мөн Улсын заан цолтой. Тэгэхээр Б.Сундуйжав энэ удмын хоёр дахь Улсын заан болж байна.
Сэтгэгдэл (18)