ЭШЛЭЛ 1
Дархан-Уулд нэг хүнд ногдох ДНБ 6.6 сая төгрөг байхад хөрш Орхонд 31 сая төгрөг байна. Энэ зөрүү бол бидэнд байгаа боломжоо илүү үр дүнтэй ашиглах шаардлагын тод илэрхийлэл.
ЭШЛЭЛ 2
Хөдөлмөрийн бүтээмж нэг жилийн дотор 26 саяас 23 сая төгрөг болж буурч, инфляц 31.7 хувьд хүрсэн байна. Тиймээс бид зөвхөн ажлын байр бус, иргэдийн бодит орлогыг өсгөх эдийн засаг бүтээх ёстой.
ЭШЛЭЛ 3
Дархан түүхий эдээ зардаг, бэлэн бүтээгдэхүүнээ авдаг хотоос нэмэгдсэн өртөг шингэсэн бүтээгдэхүүн үйлдвэрлэдэг хот болох цаг болсон.
ЭШЛЭЛ 4
Дархан-Уул төсвийн ил тод байдлаараа 21 аймгаас хоёрдугаарт эрэмбэлэгдэж байна. Энэ давуу талаа хадгалаад зогсохгүй тендер, газар, зөвшөөрөл бүрийг иргэд хянадаг тогтолцоонд хүргэх ёстой.
ЭШЛЭЛ 5
Авлига, хээл хахуулийн үзүүлэлтээр 13-т, шударга бус өрсөлдөөнөөр 13-т эрэмбэлэгдэж байгаа нь бидэнд нэг зүйлийг хэлж байна: бизнес эрхлэгч бүрт адил дүрэм үйлчилдэг орчин хэрэгтэй.
ЭШЛЭЛ 6
Төр, хувийн хэвшлийн түншлэлийн үнэлгээ 7.6-аас 6.1 болж буурсан байна. Итгэлцлийг буцаан бий болгож, төр ба бизнес хамтдаа бүтээдэг орчныг бүрдүүлэх хэрэгтэй.
ЭШЛЭЛ 7
Замын чанараараа тэргүүлж, ногоон эдийн засгийн ойлголтоор хоёрдугаарт эрэмбэлэгдсэн суурин дээрээ бид аюулгүй, ногоон, амьдрахад таатай Дарханыг бүтээж чадна.
ЭШЛЭЛ 8
Гэмт хэргийн тоо нэг жилийн дотор 543-аас 678 болж өссөн. Тиймээс гэрэлтүүлэгтэй гудамж, аюулгүй тоглоомын талбай, иргэнд ээлтэй орчин бол бидний зайлшгүй шийдэх асуудал.
ЭШЛЭЛ 9
Дархан-Уулд дундаж наслалт 21 аймгаас сүүлд эрэмбэлэгдэж байна. Эрүүл мэндийн асуудлыг хожим нь биш, эрт илрүүлэг, урьдчилан сэргийлэлтээс эхэлж шийдэх цаг болсон.
ЭШЛЭЛ 10
Эрүүл мэндийн салбарын дэд бүтэц 18-т, хорт хавдрын өвчлөл 18-т байна. Дарханчууд чанартай тусламж үйлчилгээ авахын тулд заавал Улаанбаатар зорьдог байдлыг өөрчлөх ёстой.
ЭШЛЭЛ 11
Бага ангийн нэг багшид ногдох сурагчийн тоогоор 20-т, дээд боловсрол, номын сан, соёлын хүртээмжээр 19-т байна. Дарханы ирээдүй болсон хүүхэд, залуучуудад хөрөнгө оруулахгүйгээр хотын хөгжлийг ярих боломжгүй.
ЭШЛЭЛ 12
Дархан бол Монголын анхны төлөвлөгөөт аж үйлдвэрийн хот. Бид нэг удаа бүтээж чадсан. Одоо ажилтай, орлоготой, эрүүл, боловсролтой, аюулгүй Дарханыг хамтдаа дахин бүтээе.
Сэтгэгдэл (5)