АНУ-ын цагаачлалын бодлого чангарч буй энэ үед бэлгийн чиг баримжаа, хүйсийн онцлогоосоо шалтгаалан эх орондоо хавчлагад өртөх эрсдэлтэй LGBTQ хүмүүсийг өөр улс руу албадан гаргаж буй нь хүний эрхийн байгууллагуудын анхаарлыг татаж байна.

CNN-ийн мэдээлснээр, АНУ эх оронд нь буцаах боломжгүй гэж үзсэн цагаачдыг хүлээн авах талаар хэд хэдэн улстай тохиролцоод байгаа бөгөөд зарим хүмүүс өөрсдийнх нь төрсөн улс бус, урьд өмнө огт очиж байгаагүй гуравдагч оронд албадан хүргэгдэж байна.

Үүний нэг жишээ нь Туркээс АНУ-д очсон, ижил хүйстэн эмэгтэй “Айлин” юм. Нууц нэр ашигласан тэрбээр эх орондоо амь насанд нь аюул учирч болзошгүй гэж үзэн АНУ-аас хамгаалалт хүссэн байна. Цагаачлалын шүүх түүнийг Турк руу буцаахад аюултай гэж үзсэн ч 18 сар орчим саатуулагдсаны дараа долдугаар сард Төв Африкийн Бүгд Найрамдах Улс руу албадан гаргажээ.

Тэрбээр гуравдагч улс руу явж байгаагаа нислэгийн үеэр л мэдсэн бөгөөд Банги хотод очсоныхоо дараа аюулгүй байдлаасаа эмээж, байрнаасаа бараг гарахгүй байгаа талаар CNN-д ярьжээ.

Мөн Гана улсын 21 настай бисексуал эмэгтэйг Камерун руу албадан гаргасан тохиолдлыг CNN онцолсон байна. Тэрбээр бэлгийн чиг баримжааныхаа улмаас дарамт, сүрдүүлэгт өртсөн хэмээн мэдүүлж, АНУ-аас хамгаалалт хүссэн боловч дараа нь Камерун руу шилжүүлэгджээ. Тус улсад ижил хүйстний харилцааг эрүүгийн гэмт хэрэгт тооцдог.

АНУ-ын засаг захиргаа гуравдагч улс руу шилжүүлэх бодлогыг цагаачлалын хяналтыг чангатгах арга хэмжээний нэг хэсэг гэж тайлбарлаж байна. Харин хүний эрхийн байгууллагуудын үзэж буйгаар, ийм шийдвэр нь хавчлага, хүчирхийлэлд өртөх эрсдэлтэй хүмүүсийг дахин аюултай нөхцөлд оруулж болзошгүй байна. Ингэснээр АНУ-ын шинэ цагаачлалын бодлого нь зөвхөн хилээр нэвтрэх асуудал бус, хамгаалалт хүссэн цагаачдын цаашдын амьдралд шууд нөлөөлөх асуудал болоод байна.

Л.Баяр