АНУ-ын Ерөнхийлөгч Дональд Трамп хиймэл оюуны салбарын тэргүүлэх компанийн удирдлагуудтай Цагаан ордонд уулзаж, тус технологийн хөгжлийг хэт хатуу зохицуулахгүй байх байр сууриа илэрхийллээ. Есдүгээр сарын 29-нд болсон уулзалтад OpenAI, Google, Meta, Nvidia, Anthropic зэрэг хиймэл оюуны салбарын томоохон компаниудын удирдлагууд оролцсон байна.

Трамп АНУ хиймэл оюуны салбарт Хятадтай өрсөлдөхдөө тэргүүлэх байр сууриа хадгалах шаардлагатай гэж мэдэгдээд, шинэ технологийн хөгжлийг төрийн зохицуулалтаар боомилох ёсгүй хэмээн онцолжээ. Түүний хэлснээр хиймэл оюун ухаан нь эдийн засаг, аж үйлдвэрт асар том өөрчлөлт авчрах технологи юм.

Уулзалтын үеэр хиймэл оюуны аюулгүй байдал болон хөгжлийн хурдацтай холбоотой асуудлыг мөн хэлэлцсэн байна. Технологийн компаниуд шинэ загваруудынхаа эрсдэлийг үнэлэх, дотоод хяналтын тогтолцоог сайжруулах, хараат бус үнэлгээ хийх зэрэг арга хэмжээ авах талаар сайн дурын тохиролцоонд хүрчээ.

Гэвч уг тохиролцоо нь хууль ёсны албадлагын шинжтэй бус бөгөөд компаниудын өөрсдийн хэрэгжүүлэх амлалт юм. Трамп мөн “Artificial Intelligence” буюу “хиймэл оюун ухаан” гэсэн нэршлийг төрийн түвшинд “Super Intelligence” буюу “супер оюун ухаан” хэмээн нэрлэх санаачилга гаргасан байна.

Цагаан ордны уулзалт хиймэл оюуны хөгжлийг дэмжихийн зэрэгцээ аюулгүй байдлыг хэрхэн хангах тухай маргаан эрчимжиж буй үед болжээ. АНУ-ын засаг захиргаа технологийн өрсөлдөх чадварыг нэн тэргүүнд тавьж байгаа бол зарим мэргэжилтэн, технологийн салбарынхан хиймэл оюуны хурдацтай хөгжлөөс үүдэх эрсдэлийг анхааруулсаар байна.

Л.Баяр