АҮЭБЯ-ны ТНБД Б.Дашпүрэв шатахууны асуудлаар цаг үеийн мэдээлэл хийлээ. 

Тэрбээр “Монгол Улсын хэмжээнд 128 вагон буюу 7,680 тонн автобензин байгаагаас Дархан, Эрдэнэт, Сайншанд, Толгойт, Рашаан өртөөнд 86 вагон буюу 5,160 тонн автобензин хүргэгдсэн. Улмаар ААН-үүд хуваарилалт хийж, орон нутаг болон нийслэлийн хэмжээнд хүргэгдэж байна. Мөн БНХАУ-аас 8,000 тонн АИ-92 төрлийн автобензин гэрээлж авсан. Тээвэрлэлтийн хувьд өчигдрөөс эхлэн 10 вагон бензин буулгаж, түгээлт хийсэн. Үргэлжлүүлээд Замын-Үүдийн шингэн түлш шилжүүлэн ашиглах байгууламж болон ТЭС ШТС-ын шилжүүлэн ашиглах байгууламжаар дамжуулан ирж байгаа. Мөн БНСУ-аас 12,000 тонн бүтээгдэхүүн өнгөрөхөд бэлэн болсон. ААН-үүд өөрсдийн хэмжээнд хуваарилалтуудыг хийж байгаа. 

ОХУ-д үүссэн нөхцөл байдалтай холбогдуулан шатахууны ачилт багассан. ОХУ-ын Ангарскийн нефть боловсруулах үйлдвэрээс манай улс руу шатахуун ачигддаг. Тус үйлдвэрийн зүгээс өөрсдийн хэмжээгээр ачилтыг хийж байгаа гэх тайлбарыг өгсөн. Тиймээс нийгэмд тодорхой хэмжээний бухимдал үүссэн. Олон машины дараалал үүссэн, мөн орон нутагт очер дараалал үүссэн ийм нөхцөл байдалтай байна. Ачилт ОХУ-аас харьцангуй нэмэгдэж байгаа. Ойрын хугацаанд ачилт нэмэгдэнэ. ОХУ-ын дайны нөхцөл байдал болон манай улсын шатахуун нөөцлөх сав дутуугаас хамаарч богино хугацаанд шийдвэрлэх боломж байсангүй. Цаашид үүссэн нөхцөл байдалтай уялдуулан бусад эх үүсвэрээс нөөцлөх ажлыг үргэлжлүүлнэ.

Мөн дизель түлшний хувьд нийтийн тээвэр, уул уурхайн салбар, газар тариалангаас авахуулаад эдийн засгийг хөдөлгөх хүч болсон бүтээгдэхүүн учраас салбар яамнаас өндөр ач холбогдолтой ажиллаж байна. Уул уурхайн компаниуд өөрсдийн гэсэн нөөцийг бүрдүүлж байгаа. Энгийн АИ-92 шатахуун бүр ор тас тасарсан зүйл байхгүй. Өнөөдөр ч гэсэн орон нутагт хязгаартай ч гэсэн түгээгдэж байгаа. Үнэхээр 3-4 хоног дугаарлаж, дараалалд ордог ч олддоггүй, шагийн өндөр үнэтэй болсон. Гэхдээ ОХУ-аас ачилт нэмэгдсэний хүрээнд тодорхой хэмжээнд саарсан. Буцаад өнөөдрийн нөхцөл байдлын хувьд зарим орон нутаг болон нийслэлд оочер дараалал ихээр нэмэгдсэн. Энэ нь ОХУ-д ачигдсан хэмжээ багассантай холбоотой. 

Бид бүхэн хувь хүний нөөц гэхээсээ илүү улсын нөөцөө бүрдүүлмээр байгаа юм. Улсын нөөц 20 орчим хоногийн нөөцтэй болчихвол бүх ААН-үүд үйл ажиллагаа явуулах боломжтой болж, иргэд оочер дугаарлахаа болино.

Газрын тосны бүтээгдэхүүний нөөцийг хүйтрэхээс өмнө бүрдүүлэх шаардлагатай байгаа. Нөхцөл байдал сайн биш байгааг бүгдээрээ ойлгож байгаа. Өнгөрсөн хавар, намар, зуны улиралд тодорхой хэмжээнд тасарсан. Улсаараа хомсдолд орох нөхцөл байдал үүсэхгүй. Гэхдээ нөөцөө бүрдүүлж чадахгүйгээс энэ доголдлын асуудал давтагдах нөхцөл байдалтай байгаа. Тиймээс иргэд шатахууны улсын нөөц бүрдүүлэхийг ойлгож, хэрэглээгээ багасгаж, нөөц бүрдүүлэхэд анхаарах хэрэгтэй байна” гэв.