Америкийн поп од Тейлор Свифт 2026 оны MTV Video Music Awards (VMA)-ийн үеэр шинэ дээд амжилт тогтоож, тус наадмын түүхэн дэх хамгийн олон шагнал хүртсэн уран бүтээлч боллоо. Тэр өмнө нь Бейонсетэй 30 шагналаар тэнцэж байсан бол энэ удаа шинэ шагнал хүртсэнээр түүхэн дэх ганцаарчилсан рекордыг эзэмших болсон байна.

Свифт анх удаа олгож буй Artist Director Honors шагналыг хүртсэнээр Бейонсегийн амжилтыг давжээ. Энэхүү шагнал нь уран бүтээлчийн хөгжмийн видео бүтээх, найруулах болон дүрслэлээр өгүүлэх ур чадварыг үнэлдэг байна. Свифт карьерынхаа турш 60 орчим хөгжмийн видеоны бүтээлд оролцсоноос 18-ынх нь зохиол, найруулгыг өөрөө хийжээ.

Тэр мөн ёслолын хамгийн гол шагнал болох Video of the Year-ийг “The Fate of Ophelia” дуугаараа хүртсэн байна. Свифт уг шагналаа энэ оны наймдугаар сард нас барсан кантри хөгжмийн домог Долли Партонд зориулжээ.

Шагнал гардуулах ёслолын үеэр Свифт шинэ “Patient Zero” дууныхаа клипийг анх удаа үзүүлсэн байна. Тус клипт жүжигчин Колин Фаррелл болон Дакота Жонсон нар тогложээ.

Гэхдээ Свифт бүх гол шагналыг хүртсэнгүй. Artist of the Year шагналыг Мадонна хүртсэн бөгөөд тэр нийт долоон шагнал авчээ. Харин BLACKPINK-ийн гишүүн LISA “Dream” дуугаараа Best Pop төрөлд ялалт байгуулсан байна. Ийнхүү 2026 оны VMA-аар Тейлор Свифт 31 дэх шагналаа хүртэж, Бейонсегийн хамт эзэмшиж байсан дээд амжилтыг шинэчлэн тогтоолоо.

Л.Баяр