Аж үйлдвэр, эрдэс баялгийн сайд Г.Дамдинням өнгөрөгч мягмар гарагт болсон Эзэн Чингис хааны мэндэлсний 864 жилийн ойд зориулсан УИХ-ын хүндэтгэлийн чуулганы үеэр Apple компанийн шинэ загварын iPhone утсаар зураг дарж суусан нь олны анхаарлыг татжээ. Түүний хэрэглэж буй уг утас нь iPhone 18 Duo загвар бөгөөд Apple компанийн анхны эвхэгддэг гар утас гэдгээрээ онцлог юм. Гэхдээ Apple-ийн албан ёсны нэршил нь iPhone Duo болохыг тодотгох нь зүйтэй.
Apple-ийн 2026 оны есдүгээр сарын 9-нд танилцуулсан уг загвар нь Iphone гар утасны анхны эвхэгддэг загвар гэдгээрээ онцлог. Дэлгэцийг дэлгэхэд 7.6 инчийн Super Retina XDR дэлгэцтэй, эвхсэн үедээ 5.4 инчийн гаднах дэлгэцтэй болно. Ингэснээр гар утас болон жижиг таблетын хэрэглээг нэг төхөөрөмжид нэгтгэжээ.
Техникийн үзүүлэлтийн хувьд Apple-ийн хамгийн сүүлийн үеийн A20 Pro процессороор тоноглогдсон. Арын камер нь 48 мегапикселийн үндсэн болон хэт өргөн өнцгийн хоёр камертай бөгөөд 4K нягтаршилтай, секундэд 120 кадрын бичлэг хийх боломжтой. Мөн хиймэл оюун ухаанд суурилсан Apple Intelligence болон Siri AI үйлчилгээг дэмждэг.
Батерейн хувьд дэлгэцийн дотоод хэсгийг ашиглан 31 цаг хүртэл, гаднах дэлгэцээр 44 цаг хүртэл видео тоглуулах боломжтой гэж үйлдвэрлэгч танилцуулжээ. Их биеийг 5-р зэрэглэлийн титанаар хийж, ус, тоосны хамгаалалтын IP68 стандарт хангасан байна.
Уг утасны АНУ дахь эхлэх үнэ 1,999 ам.доллар бөгөөд багтаамж, сонголтоос хамааран үнэ нь нэмэгдэнэ. Уг гар утас манай улсад ямар байгууллага, хувь хүн зарж байгаагаа болон багтаамжаасаа шалтгаалж 8-11 сая төгрөгийн үнэтэй байна.
Л.Баяр
