БАРИМТ 1
1998 оны нэгдүгээр сарын 04-нд төрсөн. Бар жилтэй.
БАРИМТ 2
Завхан аймгийн Яруу сумын уугуул. Улаанбаатар хотод төрсөн.
БАРИМТ 3
"Завхан Даян" дэвжээ, "Хилчин" спорт хороо, Жем Интернэйшнл ХХК, ХЦ-0208 ангийн бөх.
БАРИМТ 4
Биеийн өндөр 188 см. Биеийн жин 140 кг.
БАРИМТ 5
Анх 2015 онд Сумын заан цолыг хүртэж, 2016 онд цолоо баталжээ.
БАРИМТ 6
Чөлөөт бөхөөр анх 2021 онд Норвегийн Осло хотод зохиогдсон чөлөөт бөхийн ДАШТ-ээс 125кг-ийн жинд хүрэл медаль хүртсэн. 2022 оны Белградын ДАШТ-ээс мөнгөн медаль хүртэж байлаа.
БАРИМТ 7
Тэрбээр "Токио 2020" олимпод шагналт тавдугаар байр эзэлсэн. Өнгөрөгч Парисын олимпын наадамд мултарсан.
БАРИМТ 8
Ази тивийн аварга шалгаруулах тэмцээнээс 2023 онд алтан медаль хүртсэн. “Ханжоу 2022” Азийн наадмын мөнгөн медальтай. Залуучуудын ДАШТ-ээс хүрэл медальт хүртэж байсан.
БАРИМТ 9
Монгол Улсын гавьяат тамирчин цолтой.
БАРИМТ 10
2022 оны Туркийн Яшар Догугийн тэмцээнээс мөнгө, мөн онд Казахстаны Болат Турлыхановын тэмцээнээс хүрэл, “Тайчун 2017” залуучуудын Ази тивийн аварга шалгаруулах тэмцээнээс мөнгө, ОХУ-ын “Поддубный лиг 2022”-оос мөнгөн медаль хүртэж байв.
БАРИМТ 11
Түүний аав Мөнхтөр аймгийн арслан цолтой бөх. М.Лхагвагэрэл аав шигээ бөх болохыг мөрөөдсөөр арван настай байх даа үндэсний бөхөөр хичээллэсэн.
БАРИМТ 12
Түүний анхны багш нь улсын начин Б.Адъяахүү. Үндэсний бөх, чөлөөт бөхөөр 2013 оноос хослуулан барилдаж байгаа.
БАРИМТ 13
Чөлөөт бөхийн бэлтгэлээ өдгөө Монгол Улсын гавьяат дасгалжуулагч Б.Баттулгын удирдлагад дор хийж байгаа.
БАРИМТ 14
2017 онд аймгийн харцага, 2018 онд Завхан аймгийн наадамд үзүүрлэн, аймгийн заан болсон. 2019 онд цолоо баталсан.
БАРИМТ 15
2021 оны Бүх цэргийн баяр наадамд түрүүлж, Цэргийн заан болсон. Дараа жил нь дахин түрүүлж, хурцалсан юм.
БАРИМТ 16
Цэргийн арслан болсон 2022 ондоо тэрбээр Улсын заан болсон юм.
БАРИМТ 17
2023, 2024, 2025 оны улсын наадмын зургаагийн даваанд унасан бол өнөө жил найм даван Улсын гарьд цолтон боллоо.
БАРИМТ 18
"Тэр олимпын наадамд хоёр удаа оролцоно гэж зүүдэлж байгаагүй" гэж нэгэн удаа ярьж байв.
БАРИМТ 19
Тэрбээр өнөө жилийн чөлөөт бөхийн УАШТ-ийг жин хэтэрсний улмаас өнжсөн.
БАРИМТ 20
Тэр бол Завхан аймгаас төрөн гарсан тав дахь Улсын гарьд билээ. Түүнээс өмнө Улсын гарьд Ц.Цэрэнпунцаг, М.Баяржавхлан, Ш.Жаргалсайхан, Б.Гончигдамба нар энэ цолонд хүрсэн юм.
БАРИМТ 21
Тэрбээр бөхийн өргөөний улс, аймагт таван түрүүтэй.
БАРИМТ 22
Хамгийн анх Бөхийн өргөөнд түрүүлэхдээ Аймгийн заан цолтой улсын цолтнуудыг хаян түрүүлжээ. Уг барилдаан нь 2020 оны Шинэ үндсэн хууль батлагдсан өдрийн барилдаан байв. Уг барилдаанд одоогийн Улсын өсөх идэр начин Ч.Батчулуун үзүүр булаасан.
БАРИМТ 23
Харин аймаг, цэрэгт гурван түрүүтэй. Үүний хоёр нь Бүх цэргийн наадам бол нөгөөх нь 2022 оны Дашчойлин хийдийн нэрэмжит, сар шинийн баярт зориулсан аймаг цэргийн цолтой бөхчүүдийн барилдаан байв. Нэг ёсондоо тэр аймаг, цэргийн цолтны хамгийн чанга хоёр барилдаанд гурван удаа түрүүлсэн.
БАРИМТ 24
Улмаар тэр өнөө жилийн сар шинийн баярт зориулсан барилдаанд түрүүлснээр хоёр дахь түрүүгээ хүртэж, Завхан нутгийн анхны түрүү бөх болсон билээ.
