Өнөөдөр BTS, BLACKPINK зэрэг Өмнөд Солонгосын уран бүтээлчид дэлхийн хөгжмийн зах зээлд танигдсан ч тэднээс өмнө K-pop-ыг олон улсын үзэгчдэд хүргэхэд BIGBANG чухал үүрэг гүйцэтгэсэн юм. 2006 онд байгуулагдсан тус хамтлаг энэ жил уран бүтээлийн 20 жилийн ойгоо тэмдэглэж байна.

BIGBANG анх G-Dragon, T.O.P, Taeyang, Daesung, Seungri гэсэн таван гишүүнтэйгээр дебют хийжээ. Тэд K-pop, хип-хоп, R&B, электрон хөгжмийн элементүүдийг хослуулсан өөрийн гэсэн хэв маягийг бий болгож, “Lies”, “Haru Haru”, “Fantastic Baby”, “Bang Bang Bang” зэрэг хит дуугаараа Өмнөд Солонгос болон Азийн хөгжмийн зах зээлд амжилт олсон байна.

Тус хамтлагийн онцлог нь гишүүд өөрсдөө хөгжмийн бүтээлдээ идэвхтэй оролцдог байсанд оршино. Ялангуяа G-Dragon дууны зохиол, продюсерын ажилд оролцож, K-pop уран бүтээлч өөрийн хөгжмийн өнгө төрхийг бий болгож болохыг харуулсан. Түүний хувцаслалт, тайзны дүр төрх ч залуусын загварын чиг хандлагад нөлөөлж байв.

BIGBANG 2011 онд MTV Europe Music Awards-ын “Worldwide Act” шагналыг хүртсэн нь тэдний олон улсын амжилтын нэг томоохон үйл явдал болсон. 2012 онд Лондонгийн Wembley Arena-д тоглолт хийж, Европ дахь фэнүүдтэйгээ уулзжээ. Мөн тэд K-pop фэн соёлын хөгжилд нөлөөлсөн. Хамтлагийн шүтэн бишрэгчдийг “VIP” гэж нэрлэдэг бөгөөд шар өнгийн титэм хэлбэртэй “Bang Bong” гэрэл нь BIGBANG-ийн бэлгэ тэмдэг болсон.

Гэвч хамтлагийн замналд олон өөрчлөлт гарсан. Гишүүдийн цэргийн алба, бүрэлдэхүүний өөрчлөлт болон Seungri-тэй холбоотой асуудлууд үйл ажиллагаанд нь нөлөөлжээ. Seungri 2019 онд хамтлагаас гарсан. Өнөөдөр BIGBANG G-Dragon, Taeyang, Daesung гэсэн гурван гишүүнтэйгээр уран бүтээлээ үргэлжлүүлж байна. 20 жилийн ойгоороо дахин томоохон тайзнаа гарч буй нь тэдний олон жилийн уран бүтээлийн замналд шинэ хуудсыг нээж байна. BTS, BLACKPINK нар K-pop-ыг дэлхийн шинэ түвшинд хүргэсэн бол BIGBANG тэднээс өмнөх үеийн олон улсын замыг нээсэн хамтлагуудын нэг байлаа.

Л.Баяр