Хятадын хоёр аварга панда АНУ-ын Атланта хотын амьтны хүрээлэнд очихоор эх орноосоо нисэж, Бээжингийн олон жил хэрэгжүүлж буй “панда дипломат”-ын шинэ хуудсыг эхлүүллээ. Пандаг Пин Пин (Ping Ping) болон Фү Шуан (Fu Shuang) гэдэг бөгөөд хоёулаа Хятадын баруун өмнөд хэсэгт орших Чэндугийн аварга панда үржүүлгийн судалгааны баазад төрсөн байна. Пин Пин 2020 оны гуравдугаар сарын 17-нд, Фү Шуан 2020 оны аравдугаар сарын 18-нд төржээ.
Тэд есдүгээр сарын 27-нд Чэнду хотоос Атланта руу нисэж, тусгай зориулалтын FedEx Panda Express Boeing 777 онгоцоор АНУ-д хүргэгдсэн байна. Онгоцонд пандад зориулан шинэхэн хулсны нахиа, алим зэрэг хоол хүнс бэлтгэжээ. Мөн Хятадын малын эмч, асран хамгаалагчид пандаг Атлантад очсоны дараах хорио цээрийн хугацаанд хамт байхаар төлөвлөсөн байна.
Пин Пин, Фү Шуан нарыг Хятад, АНУ-ын хооронд байгуулсан шинэ хамтын ажиллагааны хүрээнд 10 жилийн хугацаатай зээлээр Атлантагийн амьтны хүрээлэнд байршуулж байгаа юм. Ингэснээр Zoo Atlanta нь аварга панда үзүүлдэг АНУ-ын гурван амьтны хүрээлэнгийн нэг болж байна.
Гэхдээ Атлантад газардсан даруйдаа жуулчдад үзүүлэхгүй. Тэд шинэ панда цогцолборын биоаюулгүй тусгаарлагдсан хэсэгт ойролцоогоор нэг сарын хорио цээрийн дэглэмд байна. Үүний дараа олон нийтэд хэзээ үзүүлэхийг амьтны хүрээлэн зарлана.
Аварга панда нь Хятадын дипломат харилцааны бэлгэдэл болсон амьтан юм. Хятад улс 1972 онд АНУ-д анх панда илгээснээс хойш энэ уламжлал үргэлжилж ирсэн. CNN-ийн мэдээлснээр, Атлантад очиж буй Пин Пиний нэр нь “энх тайван” гэсэн утгатай бөгөөд 1957 онд Хятад ЗХУ-д бэлэглэсэн анхны пандатай ижил нэртэй аж. Хятадын дарга Ши Жиньпин есдүгээр сарын 24-нд Вашингтонд айлчлах үеэрээ хоёр пандаг АНУ-д илгээх тухай зарласан бөгөөд тэднийг хоёр орны ард түмний найрамдлын “элч” хэмээн тодорхойлжээ.
Өмнө нь Zoo Atlanta-д 1999 оноос хойш панда байрлаж байсан бөгөөд тухайн хамтын ажиллагааны 25 жилийн хугацаанд Лүн Лүн, Ян Ян хосоос долоон бяцхан панда төрсөн байна. Тэдний хамгийн сүүлчийн дөрвөн панда 2024 оны аравдугаар сард Хятад руу буцсан юм.
Л.Баяр
