Өмнөд Солонгосын Ерөнхийлөгчийн Тамгын газар Украин улс Орос-Украины дайнд олзлогдсон Хойд Солонгосын хоёр цэргийг Өмнөд Солонгост шилжүүлсэн талаарх мэдээллийг олон нийтэд зарласанд “гүнээ харамсаж” буйгаа илэрхийлжээ.

Украины Ерөнхийлөгч Владимир Зеленский НҮБ-ын Ерөнхий Ассамблейн чуулганд үг хэлэх үеэрээ Украин улс Хойд Солонгосын хоёр олзлогдогчийг Өмнөд Солонгост шилжүүлсэн гэж анх олон нийтэд мэдээлсэн байна. Тэднийг 2025 оны нэгдүгээр сард ОХУ-ын Курск мужид Украины цэргүүд баривчилжээ. Өмнөд Солонгосын талын мэдээлснээр, хоёр цэрэг Өмнөд Солонгост очих хүсэлтэй байгаагаа илэрхийлсэн бөгөөд тэднийг хүмүүнлэгийн үндэслэлээр шилжүүлсэн байна. Өмнөд Солонгос дайны тал биш учраас энэ нь олзлогдогсод солилцсон үйл явдал биш гэж тус улсын эрх баригчид тайлбарлажээ.

Гэвч шилжүүлгийн талаарх мэдээллийг олон нийтэд зарласан асуудал хоёр улсын хооронд маргаан үүсгээд байна. Өмнөд Солонгосын Ерөнхийлөгчийн Тамгын газар Украины талтай мэдээллийг нууцлах талаар тохиролцсон байсан гэж мэдэгдэв. Тус тохиролцоо нь Хойд Солонгост үлдсэн олзлогдогсдын ар гэр болон өөрсдөө эрсдэлд орохоос хамгаалах зорилготой байсан гэж тайлбарласан байна.

Харин Украины тал ийм нууцлалын гэрээ байгааг үгүйсгэжээ. Зеленскийн зөвлөх Дмитро Литвин хоёр цэргийг хаашаа шилжүүлснийг нууцлах талаар тохиролцоо байгаагүй гэж мэдэгдсэн байна. Мөн олзлогдогсдыг хаашаа илгээснийг бүрэн нууцлах нь зохисгүй гэж Украины тал үзжээ.

Өмнөд Солонгосын тагнуулын мэдээллээр Хойд Солонгос 2024 оноос хойш ОХУ-ын дайнд туслахаар ойролцоогоор 14,000–15,000 цэрэг илгээсэн гэж тооцоолж байна. Тэдний олонх нь Курскийн хилийн бүсэд тулалдаж байгаа бөгөөд 6,000 гаруй нь амиа алдсан байж болзошгүй гэж Өмнөд Солонгос, Украин болон барууны албаныхан мэдээлжээ.

Энэ асуудлыг Өмнөд Солонгосын Ерөнхийлөгч Ли Жэ Мён болон Зеленский нар өнгөрсөн долдугаар сард хэлэлцэж, Хойд Солонгосын олзлогдсон цэргүүдийн асуудлыг олон улсын хууль болон хүмүүнлэгийн зарчмыг баримтлан шийдвэрлэхээр тохиролцсон байна.

Л.Баяр