ОХУ-д дөрвөн жил гаруй хугацаанд хоригдсон АНУ-ын Тэнгисийн явган цэргийн ахмад Роберт Гилман наймдугаар сарын 11-нд суллагдаж, эх орондоо буцаж ирлээ. Түүнийг Оросын Ерөнхийлөгч Владимир Путин хүмүүнлэгийн үндэслэлээр өршөөсөн бөгөөд суллахдаа АНУ-аас ямар нэгэн хоригдол нэхээгүй, өөрөөр хэлбэл хоёр улсын хооронд хоригдол солилцоо хийгдээгүй байна.
32 настай Гилман 2022 онд Оросын Воронеж хотод цагдаагийн ажилтанд халдсан гэх хэргээр баривчлагдсан юм. Тэрбээр анх 4.5 жилийн хорих ял авсан боловч шоронд байх хугацаандаа хорих байгууллагын ажилтнууд болон хууль сахиулагчдад халдсан гэх нэмэлт хэргүүдээр дахин ял шийтгүүлж, нийт ялыг нь 10 жил болгон сунгасан байна. Түүний гэр бүл болон АНУ-ын тал эдгээр хэргүүдийг үндэслэлгүй гэж үзэж байжээ.
Гилманы биеийн байдал хоригдож байх хугацаанд эрс муудсан байна. Тэрбээр зургадугаар сард Оросын иргэний сэтгэцийн эмнэлэгт шилжүүлэгдэж, амь насанд нь аюултай хэмжээнд хүрсэн, кататони маягийн байдалд орсон талаар гэр бүл болон түүнийг суллуулахын төлөө ажиллаж байсан хүмүүс мэдээлжээ. АНУ-ын албаныхан түүнийг эх оронд нь авчирч, шаардлагатай эмчилгээ үзүүлэхийг Москвагаас хүсэж байв.
АНУ-ын Ерөнхийлөгч Дональд Трамп Гилманыг сулласан тухай наймдугаар сарын 11-нд мэдэгдэж, энэ нь ОХУ-ын Ерөнхийлөгч Владимир Путинтэй хийсэн яриа хэлэлцээний үр дүн гэж тайлбарлав. Трампын хэлснээр Москва Гилманыг “хүмүүнлэгийн үндэслэлээр” сулласан бөгөөд оронд нь ямар нэгэн хүн шаардаагүй гэнэ.
Гилман АНУ-ын Төрийн департаментын онгоцоор эх орондоо ирсэн бөгөөд Вашингтоны ойролцоох Даллесийн олон улсын нисэх буудалд газарджээ. Түүнийг АНУ-ын тусгай элч Стив Виткофф угтан авч, дараагийн эмчилгээ, сэргээн засах тусламжийг Техас мужийн Сан-Антонио хотод үргэлжлүүлэхээр болсон байна.
Гилманы гэр бүл түүнийг суллагдсан явдлыг олон жил үргэлжилсэн тэмцлийнх нь том үр дүн хэмээн үзэж байна. Түүний эгч Лекси Хадсон Трамп болон Массачусетсийн сенатор Эд Марки нарын хүчин чармайлтыг онцолжээ. Харин АНУ-ын Төрийн нарийн бичгийн дарга Марко Рубио Орост хоригдож буй бусад америк иргэдийг мөн суллахыг Москвад уриалсан байна.
Л.Баяр
