Хятадын дотоодод үйлдвэрлэсэн COMAC C919 зорчигч тээврийн онгоц өнөөдөр буюу наймдугаар сарын 12-нд олон улсын анхны хуваарьт нислэгээ Бээжин–Улаанбаатарын чиглэлд эхлүүллээ. Ингэснээр Монгол Улс C919 онгоцны олон улсын тогтмол зорчигч тээврийн анхны чиглэл болсон байна. Уг нислэгийг Хятадын үндэсний агаарын тээврийн компани болох "Air China" өдөр бүр үйлдэхээр төлөвлөсөн бөгөөд Бээжингийн олон улсын нисэх буудал болон Улаанбаатарын хооронд C919 онгоцоор зорчигч тээвэрлэх юм. Энэ нь 2023 онд Хятадад арилжааны нислэг үйлдэж эхэлсэн C919-ийн хувьд гадаадын улс руу хийж буй анхны тогтмол зорчигч тээврийн үйлчилгээ болж байна.

COMAC C919-ийг Хятадын төрийн өмчит Commercial Aircraft Corporation of China буюу COMAC компани үйлдвэрлэдэг. Тус онгоц нь нэг эгнээтэй, дунд зайн зорчигч тээврийн ангилалд багтдаг бөгөөд 158–192 хүртэлх суудалтай, хувилбараасаа хамааран ойролцоогоор 4,075–5,555 км нисэх боломжтой.

C919 нь дэлхийн иргэний агаарын тээврийн зах зээлд давамгайлж буй Boeing 737 болон Airbus A320 гэр бүлийн онгоцнуудтай өрсөлдөх зорилготой бүтээсэн загвар юм. COMAC-ийн мэдээллээр C919-ийг China Eastern Airlines, Air China, China Southern Airlines компаниудад нийлүүлж, Хятадад арилжааны үйлчилгээнд нэвтрүүлээд байна.

Гэхдээ C919 нь одоогоор дэлхийн зах зээлд Boeing, Airbus-ийг шууд орлох хэмжээнд хүрсэн гэж үзэхэд эрт байна. Онгоц нь Хятадын үйлдвэрлэлийн бүтээл боловч олон улсын нийлүүлэлтийн сүлжээ, тэр дундаа барууны технологи, эд ангиас тодорхой хэмжээнд хамааралтай хэвээр байгаа бөгөөд АНУ болон Европын зохицуулагч байгууллагуудын гэрчилгээний асуудал ч бий.

Ийнхүү Бээжин–Улаанбаатарын чиглэл C919-ийн олон улсын нислэгийн түүхийг эхлүүлж байгаа нь Хятадын иргэний агаарын хөлгийн үйлдвэрлэл дэлхийн зах зээлд гарах үйл явцын анхаарал татахуйц алхам болж байна. Монгол Улс энэ түүхэн нислэгийн анхны олон улсын чиглэл болсон нь манай улсын хувьд ч онцлох үйл явдал юм.

Л.Баяр