Олон улсын хөлбөмбөгийн холбоо буюу FIFA-гийн Гүйцэтгэх захирал Кевин Ламур ерөнхийлөгч Жанни Инфантиноогийн маргаантай төлөвлөгөөг ил тод шүүмжилснийхээ дараа албан тушаалаасаа явлаа. FIFA түүнийг 2026 оны наймдугаар сарын 17-нд байгууллагатай байгуулсан хөдөлмөрийн харилцаагаа дуусгавар болгосныг баталсан байна. Ламур нь FIFA-гийн хамгийн өндөр албан тушаалтнуудын нэг бөгөөд 2024 оны арваннэгдүгээр сард тус байгууллагын үйл ажиллагаа хариуцсан захирлаар томилогджээ. Тэр өмнө нь Европын хөлбөмбөгийн холбоо буюу UEFA-д ажиллаж байсан бөгөөд Инфантиноотой хамтран ажиллаж байсан туршлагатай нэгэн байв.

Түүний ажлаас чөлөөлөгдсөн шалтгаан нь Инфантиногийн санаачилсан "FIFA Forward Enterprise" буюу FFE төслийг хүчтэй шүүмжилсэнтэй нь холбоотой гэж олон улсын хэвлэлүүд мэдээлж байна. Уг төлөвлөгөөний хүрээнд FIFA-гийн тэмцээнүүдийн, тэр дундаа ДАШТ-ий арилжааны болон тасалбарын эрхийг удирдах шинэ компани байгуулж, тус компанийн тодорхой хувийг хувийн хөрөнгө оруулагчдад худалдахаар төлөвлөж байжээ.

Инфантиноогийн төлөвлөгөөг FIFA-гийн гишүүн холбоод болон бусад хөлбөмбөгийн байгууллагууд хүчтэй эсэргүүцсэнээр төсөл эцэст нь цуцлагдсан юм. Төлөвлөгөөнд шинэ компанийн 21 хувийг хувийн хөрөнгө оруулагчдад худалдах асуудал багтаж байсан бөгөөд энэ нь FIFA-гийн удирдлагын ил тод байдал, байгууллагын эрх мэдлийн бүтэцтэй холбоотой маргаан дагуулсан байна. Ламур өнгөрсөн долдугаар сарын сүүлээр уг төслийг “нэг хүний төсөл” хэмээн тодорхойлж, FIFA-гийн захиргааг төлөвлөгөөний талаар бүрэн мэдээлэлгүй, хууртагдсан мэт байдалд орсон гэж мэдэгдсэн. Тэр мөн FIFA-гийн ажилтнууд хөлбөмбөгт үйлчлэх үүрэгтэй боловч байгууллагын удирдлагын арга барил энэ зорилготой зөрчилдөж байна гэж шүүмжилжээ.

Тэр үед Ламур шүүмжлэлийнхээ төлөө ажлаа алдаж болзошгүй гэдгээ ч ухамсарлаж байгаагаа илэрхийлж, “Хэрэв үүний улмаас би ажлаа алдвал тэгэх л ёстой. Би шийдвэрийг ойлгож, хүндэтгэнэ” гэсэн байр суурь илэрхийлж байв. Харин FIFA түүнийг “халсан” гэхээсээ илүү “ажлын харилцаагаа дуусгавар болгосон” гэж тайлбарлажээ.

FIFA-гийн төлөөлөгч Ламурт хоёр жилийн хугацаанд байгууллагад ажилласанд нь талархаж, цаашдын ажилд нь амжилт хүссэн боловч түүнийг яагаад явуулсан талаар нэмэлт тайлбар өгөхөөс татгалзсан байна.

Л.Баяр