Монголын өмгөөлөгчдийн холбоо өнөөдөр хуралдаж, тэргүүнээ томилно. Өмгөөлөгчдийн холбооны тэргүүнд одоогоор Б.Батзаяа, Н.Оюу-Эрдэнэ, Г.Наранбаатар нарын гурван нэр дэвшигч тунаж үлдээд байгаа. Мэргэжлээрээ олон жил ажилласан энэ гурван нэр дэвшигчээс салбартаа төдийгүй олон нийтэд нэлээд танигдсан нь Б.Батзаяа. Түүнийг одоогийн Ерөнхийлөгчийн тун ойрын хүн хэдээдэг. Түүнийг жирийн гишүүн байхад холбогдож байсан маргаантай асуудлууд дээр нь Б.Батзаяа өмгөөлөгчийн нэр давхар гарч ирдэг. Өмгөөлөгчөөр нь ажилладаг байсан гэсэн үг л дээ. Б.Батзаяа бол дуулиан шуугиантай томоохон хэргүүдэд нэр холбогдож, уснаас хуурай гарч чаддаг, “овжин” нэрээр салбартаа төдийгүй олонд танигдсан “Ананд адвокатс” ХХН-ийн үүсгэн байгуулагч.

Ингэж нэрлэсний цаад шалтгааныг уншигчид төвөггүй ухах биз ээ. Цахим орчны хайлтаар түүний тухай хайхад МИАТ-ийн мөнгө угаасан хэрэгт холбогдож шүүхээс ял авч байсан Ч.Хоролсүрэнгээс хоёр сая ам.долларыг нь залилсан асуудалд холбогдож, мөнгө угаасан байж болзошгүй болон татвартай холбоотой зэрэг хэргүүдэд нэр холбогдож байсан. Мөн Салхитын мөнгөний орд, ирвэс хамгаалагч залуу амиа алдсан хэрэгт холбогдон шалгагдсан гээд ер нь л нийгэмд дуулиан шуугиан тарьсан асуудалд Б.Батзаяа ямар нэгэн тохиолоор холбогдож, заримд нь бүр сэжигтнээр татагдаж байсан удаатай. Гэвч холбогдсон хэргүүд нь хэрхэн шийдэгдсэн эсэх нь тодорхойгүй, асуулт болон үлддэг нь хачирхмаар. Мөн 2016 онд ирвэс хамгаалагч залуу амиа алдахад хуулийнхан тухайн хэсэг нутагт аюул учруулж буй Хятад компаниудыг шалгасан. Энэ үеэр Б.Батзаяаг яллагдагчаар татан шалгаж байв. Б.Батзаяаг баривчилсан цаад учир нь түүгээр дамжуулж одоогийн Ерөнхийлөгч Х.Баттулга нарыг шалгах зорилготой байсан гэж ярьдаг. Эндээс хэр ойрын хүн гэдэг нь харагдаж буй биз ээ.  Энэ утгаараа холбооны ерөнхийлөгчөөр сонгогдох магадлал тун өндөр, хамт нэр дэвшсэн хоёроо бодвол “мотор” томтой нэгэн.  Ийм хүн Өмгөөлөгчдийн холбоог удирдахаар санаархаж явна.

Улсын хэмжээнд өмгөөллийн үйл ажиллагаа явуулах эрхтэй 1200 гаруй өмгөөлөгч бий. Сонгогдсон ерөнхийлөгч хуулиар олгогдсон бүрэн эрхийнхээ хүрээнд өмгөөлөгчдийн хувь заяаг хариуцахаас гадна холбоог төлөөлөх, хөрөнгө захиран зарцуулах, салбар зөвлөлийн даргыг томилох, чөлөөлөх зэрэг эрх эдэлнэ.

Өмгөөллийн тухай хуулийн 43.2-т “Өмгөөлөгчдийн Холбооны ерөнхийлөгчөөр өмгөөллийн үйл ажиллагааг 10-аас доошгүй жил эрхэлсэн, Өмгөөлөгчдийн Холбооны гишүүн Монгол Улсын иргэнийг Их Хурал нууц санал хураалтаар сонгоно". Ингэхдээ гурван жилийн хугацаагаар сонгох бөгөөд нэг удаа улирах эрхтэй гэж заасан байдаг.

Өмглөөгчдийн холбооны ерөнхийлөгчийг өнөөдөр сонгоно. Сонгогдсон ерөнхийлөгч дээрх эрхийг эдэлнэ. Гэхдээ эрх эдлэхээс гадна хүлээх хариуцлага нь ч түүнтэй адил өндөр. 1200 гаруй өмгөөлөгчийн хувь заяаг атгах гэж зүтгэж байгаа Б.Батзаяад итгэх хүн харин хэр олон бол?

Б.Лхам