Прокурорын байгууллагаас энэ оны гуравдугаар улиралд хянан шийдвэрлэсэн хэргийн талаар мэдээлэл хийлээ.

Авлига албан тушаалын гэмт хэргээс нийтийн албаны буюу төсөвтэй шууд харьцдаг хүмүүст холбогдох хэрэг 71.3 хувийг эзэлж байна. Мөнгө угаасан байж болзошгүй 239 хэрэгт хяналт тавьж 77 хэрэгт нь яллах дүгнэлт үйлдэн шүүхэд шилжүүлжээ.

НПГ-ын орлогч прокурор Ц.Насанбат “НПГ-аас энэ оны гуравдугаар улиралд нийт 71 хэрэгт яллах дүгнэлт үйлдэж, шүүхэд шилжүүлсэн. Эдгээрээс тодруулбал, цахим хэрэгсэл ашиглаж бусдыг залилах хэрэг үйлдсэн БНХАУ-ын нэр бүхий иргэдэд холбогдох хэрэг, Эрүүл мэндийн яамны нэр бүхий хүмүүст холбогдох хэрэг, С.Баяр, С.Баярцогт, Ж.Эрдэнэбат, Д.Эрдэнэбат нарт холбогдох мөнгө угаах гэмт хэргүүдийг шалган шийдвэрлэсэн. 

Өнөөдрийн байдлаар "Жаст" группын захирал Ш.Батхүү нарт холбогдох залилах, мөнгө угаасан зэрэг хэрэгт холбогдох хэргийн шүүх хурал гурав дахь өдрөө үргэлжилж байна” гэлээ.

Ингээд сэтгүүлчдийн асуултад өгсөн зарим хариултыг хүргэе. 

-ЗГХЭГ-ын даргыг тагнаж, чагнасан асуудал ямар шатандаа явж байна вэ?

-ЗГХЭГ-ын дарга Л.Оюун-Эрдэнийг тагнаж чагнасан асуудлаар ТЕГ-ын нэр бүхий 11 албан тушаалтныг мөрдөн шалгаж байгаа. Мөрдөн шалгах ажиллага явагдаж байна. Одоогоор тод мэдээлэл өгөх боломжгүй.

-“Жи тайм” сүлжээтэй холбоотой асуудал юу болсон бэ?

-“Жи тайм” сүлжээнд хохирсон 11386 хохирогчийн зөрчигдсөн эрхийг сэргээх шүүхийн шийдвэр гарсан.

-Ц.Элбэгдоржийг шалгах асуудал ямар шатандаа явж байна вэ?

-Мөрдөн байцаалтын шатанд шалгагдаж байгаа. Тодорхой шийдвэр гараагүй учраас үйлдэл, зүйлчлэлийн талаар мэдээлэл өгөх боломжгүй.

А.Сүх