УИХ-ын 2016 оны сонгуулийн өмнө “60 тэрбум” төгрөг босгох схем ярилцсан ярианы нэг цаг 30 минутын бичлэг задарч, эл үйлдлийг тагнуул, цагдаа, АТГ-аас томилсон ажлын хэсгийнхэн шалгаж, зарим нөхдөд зохих ял шийтгэлийг нь ногдуулсан. Харин тэднээс МАН-ын дарга асан М.Энхболд сугарч үлдэж чадсан юм. Тэрбээр бичлэгийг анх эвлүүлэг гэж гүрийсэн ч эцэстээ үнэнд гүйцэгдэн бодит яриа гэдгийг шүүх шинжилгээний мэргэжилтнүүд тогтоосон байдаг.

Эл хэрэгтэй холбогдуулан 1400 гаруй төрийн албан хаагчаас тайлбар авсны дотор УИХ-ын дарга М.Энхболд ч багтсан.

Түүнд холдбогдох хэргийг бусдаас нь тусгаарлан шалгасан ч эцэстээ хэргийг хэрэгсэхгүй болгосон байдаг. Учир нь, түүнийг тойрон хүрээлэгчид дунд хууль хяналтынхан тэр дундаа шүүх, прокурор, цагдаагийн удирдах албан тушаалтнууд багтдагтай холбоотой гэдэг. Энэхүү бичлэгээс болж М.Энхболд Ерөнхийлөгчийн сонгуульд өвдөг шороодсон бол  өрсөлдөгч болох Х.Баттулгад харин “олз” болсон. Тиймдээ ч Х.Баттулга Ерөнхийлөгч болсныхоо дараа ч эл хэргээр М.Энхболдыг фракцаар нь дарж авахаар санаархаж, байсхийгээд л АТГ, цагдаагийн дарга нарыг дуудан үүрэг даалгавар өгч, мөрдөн шалгах ажиллагааг яаравчлуулж байсан билээ.

Тухайн үедээ дуулиант эл хэргийн гол эзэн гэгдэж байсан М.Энхболд сугарч үлдэж чадсан ч түүнийг араандаа зуусан хэсэг нөхөд  хэргийг нь сэргээж дөнгөжээ.

Тодруулбал, Нийслэлийн прокурорын газраас МАН-ын дарга асан М.Энхболдод холбогдох “60 тэрбум”-ын хэргийг сэргээж, мөрдөн байцаалтын ажиллагааг эхлүүлжээ. 

60 тэрбумын гэгдэх хэргийг ЦЕГ, АТГ, ТЕГ-аас томилсон, хамтарсан ажлын хэсэг шалгаж байгаа юм. Ерөнхийлөгч Х.Баттулга АТГ-ын дарга Х.Энхжаргалтай хоёр удаа уулзан, энэ хэргийн мөрдөн шалгах ажиллагааг яаравчлуулах үүрэг өгсөн юм.

У.Тэргэл