ЗГХЭГ-ын дэд, “Эрдэнэс Тавантолгой” компанийн ТУЗ-ийн даргаар ажиллаж байсан Г.Дэнзэнд холбогдох хэргийг Чингэлтэй дүүргийн эрүүгийн хэргийн анхан шатны шүүхийн шүүгч Л.Галбадар өчигдөр хэлэлцэх товтой байв. Гэвч зарим өмгөөлөгчийн шүүх хурал давхцсан, мөн хэд хэдэн гэрчээс нэмж мэдүүлэг авах хүсэлт гаргасан учраас хойшлуулахаар болжээ.

Г.Дэнзэнг “Эрдэнэс Тавантолгой” компанийн гүйцэтгэх захирал асан Я.Батсуурь болон хуулийн хэлтсийн мэргэжилтэн Т.Төгсбаяр, хүргэн ах Г.Түмэнхүү, “Говь повер” компанийн төлөөлөгч Д.Баярмаа нарын хамт эд хөрөнгө завшсан, эрх мэдлээ урвуулсан хэрэгт ялласан билээ.

Тиймдээ ч анхан шатны шүүхээс Г.Дэнзэн, Г.Түмэнхүү, Т.Төгсбаяр нарт 5,6 жил, Я.Батсуурь, Д.Баярмаа нарт 5,1 жилийн хорих ял ногдуулсан. Тэдний ялыг Өршөөл үзүүлэх тухай хуулийн зүйчлэлд хамруулан Г.Дэнзэнг 3,6 жил, Я.Батсуурьт хоёр жилийн хорих ял оноосон билээ.

Гэвч хэргийн холбогдогчид шүүхийн энэхүү шийдвэрийг үл зөвшөөрөн Улсын Дээд шүүхийн хяналтын шатанд гомдол гаргасан ба тус шүүхийн Эрүүгийн танхимын шүүгчид хэргийг хянаад нотолбол зохих асуудлыг бүрэн шалгаж тогтоогоогүй, хохирлын хэмжээг нарийвчлан гаргаагүй хэмээн үзэж, хэргийг дахин хэлэлцүүлэхээр анхан шатны шүүхэд буцаасан юм.

Харин прокуророос хөөн хэлэлцэх хугацаа дууссан гэсэн үндэслэлээр хэргийг хаахаар шийдвэрлэсэн ч Г.Дэнзэн “Би гэмт хэрэг хийгээгүй. Тиймээс гэм буруугүй гэдгээ шүүхээр нотлуулна” гэсний дагуу түүнд холбогдох хэргийг шүүхэд шилжүүлээд байгаа юм. 

У.Тэргэл