Ерөнхий сайд асан С.Баяр болон Ч.Давааням нарт холбогдох эрүүгийн хэргийг шүүх хурал Нийслэлийн Эрүүгийн хэргийн давж заалдах шатны шүүхэд өчигдөр болсон билээ.

Давж заалдах шатны шүүх бүрэлдэхүүн шүүгдэгч С.Баярцогт, Б.Бямбасайхан, Д.Ганболд, Б.Ариунсан, Б.Бадрал нарын эрүүгийн хэрэгт шүүгдэгч С.Баяр, Ч.Давааням нарт холбогдох хэргийг нэгтгэж, шүүх нь зүйтэй хэмээн үзэв.

Учир нь, шүүгдэгч С.Баяр, Ч.Давааням нарын өмгөөлөгч хэргийг нэгтгэн шийдвэрлүүлэх хүсэлт гаргасан. Мөн үндсэн хэргийн материалаас тэдэнд холбогдох баримтуудыг эх хувиар нь салгах байдлаар тусгаарласан хэргийн материалыг бүрдүүлэх боломжтой байхад прокурорын өгсөн зааварчилгааны дагуу холбогдох материалуудыг хуулбарлан, дугааргүй хэргийн материал бүрдүүлсэн. Энэхүү хуулбар материалыг судлахад, анхан шатны шүүхээр хэрэг хянан хэлэлцэх явцад буюу шүүгдэгч С.Баяр, Ч.Давааням нарт холбогдох хэргийг тусгаарлаж шийдвэрлэхээс өмнө хийсэн ажиллагааны баримтууд болон хэргийн оролцогчдоос гаргасан хүсэлт, түүнд хавсаргасан баримтууд авагдаагүй зэрэг шалтгаанаар хэргийг нэгтгэн шийдвэрлэхээр болсон байна.   

Чингэлтэй дүүргийн Эрүүгийн хэргийн анхан шатны шүүхийн 2020 оны долоодугаар сарын 6-ны өдрийн шүүх хуралдаанаар хэргийг хэлэлцэх явцад прокурор, өмгөөлөгчдийн “...хэргийг тусгаарлаж шийдвэрлүүлэх...”санал, хүсэлтийг үндэслэн шүүгдэгч С.Баярцогт, Б.Бямбасайхан, Д.Ганболд, Б.Ариунсан, Б.Бадрал нарт холбогдох эрүүгийн хэргээс шүүгдэгч С.Баяр, Ч.Давааням нарт холбогдох хэргийг тусгаарлах тухай шийдвэр гаргаж байсан юм.

Давж заалдах шатны шүүх хэргийг ийнхүү нэгтгэн шийдвэрлэхээр болов. Үүнтэй зэрэгцэн Ерөнхийлөгч асан Ц.Элбэгдорж улс төрийн 14 хоригдолд уучлал үзүүлэх хэрэгтэй гэх “мессеж”-ийг Ерөнхийлөгч Х.Баттулгад хаяглан илгээсэн нь олны анхаарлыг татаж буй юм.

Тодотговол, улс төрийн хоригдол гэгдэж буй хүмүүст С.Баярцогт, Б.Бямбасайхан, Д.Ганболд, Б.Ариунсан, Б.Бадрал, С.Баяр, Ч.Давааням нар багтах нь гарцаагүй. Товчхондоо тэднийг “Оюутолгой” хөрөнгө оруулалтын, Хувь нийлүүлэгчийн болон Дубайн гэрээг батлахдаа эрх мэдэл, албан тушаалын байдлаа урвуулан ашиглаж, бусдад давуу байдал бий болгон, улсад их хэмжээний хохирол учруулсан хэмээн буруутган шүүж байгаа.

Харин улс төрийн хэрэгтэн гэгдэх эрхмүүд хэргээ ийнхүү нэгтгэн шийдүүлэх хүсэлт гаргаж, уучлалд хамрагдахаар хичээж байна уу гэх хардлага олон нийтийн дунд хөвөрч эхэллээ. Ямартай ч маргааш буюу арванхоёрдугаар сарын 3-ны өдөр болох Давж заалдах шатны шүүх хуралдааны шийдвэр хэрхэн гарах нь олны анхааралд байна.    

Б.Бат