Засгийн газрын хуралдаанаар гаргасан шийдвэрийг ЗГХЭГ-ын дарга Н.Учрал танилцууллаа.
Тэрбээр "Төр түмнээс алдагдсан 34-50 хувийг Үндэсний баялгийн санд эргүүлэн авч, баялагтаа эзэн Монгол, хүн бүрд үр өгөөжийг нь хүртээх даалгавартай ажлын хэсгийг ахалж байгаа. Монголын баялаг бол аль нэг намын өмч огт биш, аливаа нэгэн улстөрчийн хувийн хөрөнгө биш. Зэс, нүүрс, уран, газрын ховор элемент, жонш, төмөр, алт, мөнгө бүгдээрээ л монголын баялаг. Төгрөг нуур, Ухаа худаг ч бай, Овоо толгой, уул, овоолго бүгд монголын баялаг. Байгалийн баялагийг хэн нэгэн бүтээгээгүй. Тийм учраас байгалийн баялагтаа ард түмэн эзэн байх, Баялгийн сангаараа дамжуулж эрүүл мэнд, орон сууц, боловсролдоо зарцуулах хууль эрх зүйн орчиныг бүрдүүлсэн улс.
Аль намын хэн эзэмшсэн байх нь огт хамаагүй. Төр түмэн нуураа ч авна, худгаа ч авна, уулаа ч авна, толгойгоо ч авна, овоолгоо ч авах л ёстой. Энэ бол Үндэсний баялгийн сангийн хууль, Ашигт малтмалын хуулиар бүрдүүлсэн эрх зүйн орчин. Тэгэхээр хэлэлцээрүүдийг хийнэ.
Стратегийн орд бол 2007 оны тогтоол дээр 39 орд байсан. Нэг ордыг нь ярихад л олон асуудал гарч ирж байгаа учраас хяналт, шинэжилгээ хийх ёстой. Ирээдүйд өр биш өв үлдээхийн тулд анхааралтай ажиллах ёстой.
Тавантолгойн ордын Бортээгийн уурхайд Эрдэнэс Тавантолгой болон Админерал зэрэг МТАС түншлэлийн компаниудтай 2021 оны арваннэгдүгээр сарын 17-нд байгуулсан хөрс хуулалт, нүүр олборлолт, тэсэлгээ, баяжуулалтын гэрээг хүчингүй болгоно.
Төгрөг нуурын ордтой л намайг зууралдаж байна гэсэн мэдээлэл явж байна. Төрийн тэргүүн байсан хүн Баялагийн эзэн монголчууд гэж хоолойгоо сөөтөл ярьдаг атлаа нотолчихвол өөрөө өгнө гэж ард түмнийг тохуурхсан. Өнгөрсөн хугацаанд баг ажиллаж, баримтуудыг цуглуулж, хуулийн байгууллагад хүргүүлсэн. Үндэстэн дамнуулсан схем үүсгэж зарсан гурван хайрцаг баримт өгсөн. Хэрэг бүртгэлтийн хэрэг нээж шалгаж байна гэсэн мэдээлэл өгсөн. Өргөн бүрэллдэхүүнтэй ажлын хэсэг байгуулагдан ажилдаа орсон гэж прокурорын газраас мэдээлэл өгсөн.
Монголын баялагаар муур, хулгана шиг тоглож байгаа үйлдлүүд дахин давтагдах юм бол Монголын хууль дуудах ёстой.
Төр авсан хойно гадаад, дотоодын эзэд гарч ирж хувьцаа, мөнгөө нэхэж улсаараа олон улсын шүүхэд дуудагвал яах вэ? Гэдгийг бодох хэрэгтэй гэдгийг ганцхан ордын жишээ харуулж байна. Тиймээс маш ухаалаг ажиллах шаардлага үүсэж байна.
Ухаа худагийн орд дээр авч хэрэгжүүлэх арга хэмжээний тухай тогтоолын төслийг Засгийн газраас өргөн мэдүүлсэн. Нэмэлтээр баримтуудыг илгээж байна. Ажлын хэсэг байгуулсан.
Эрдэнэт үйлдвэрээс гарсан овоолго нэртэй үүсмэл ордоос Ачит Ихт, Зэс эрдэнийн хувь зэрэг гурван компани тэрбум, тэрбумаар ашиг хийж байгаа гэх мэдээллийг та бүгд сонссон. Хувийн хэвшилтэйгээ хэлэлцээр хийх зайлшгүй шаардлага байгаа" гэлээ.
