Энэ сарын 8-12-нд УИХ-ын Оюутолгойн асуудлаарх хянан шалгах түр хорооны нээлттэй сонсгол болно. Сонсголд үе үеийн Ерөнхийлөгч, УИХ-ын дарга, Ерөнхий сайд зэрэг төрийн өндөр албан тушаал хашиж байсан 300 гаруй хүн гэрчээр дуудагдсан. Тэдгээрийн нэг нь Ерөнхий сайд асан Санжийн Баяр юм. Харин тэрбээр энэ удаагийн сонсголд очихгүй гэдгээр илэрхийлээд, учир шалтгаанаа ийн тайлбарлажээ.
Тодруулбал, "Оюутолгойн түр хорооны сонсголд очихгүй байхын учир нь:
1. Дээрх 2 асуудлыг (Хайгуулын лицензтэй байсан "Онтре"-гийн талбай, Хувь нийлүүлэгчдийн гэрээ, санхүүжилтийн хүүгийн хувь, түүнийг олон улсын зах зээлийн жишигт нийцүүлэн бууруулах талаар авч хэрэгжүүлсэн арга хэмжээ, холбогдох үр дагавар гэх мэт) миний удирдаж байсан ЗГ хэлэлцэж байгаагүй. Иймээс энэ талаар түр хороонд өгөх мэдээлэл надад алга.
2. "Гайт" 34 хувьд ногдох санхүүжилтийн зээл, түүний хүүгийн талаар Монгол Улсын ЗГ нь "Рио Тинто" компанитай хэлэлцээр хийж буй. Ийм үед энэ сэдвээр нээлттэй сонсгол хийж, Монголын талын байр суурийн талаар ил задгай ярих нь сөрөг нөлөө үзүүлнэ.
3. Оюутолгой нь эдийн засаг, бизнесийн том төсөл байхын зэрэгцээ хэмжээ, чиглэл, ач холбогдол зэргээрээ гурав дахь хөршийн хөрөнгө оруулалт, манай улсын аюулгүй байдал, хөгжилтэй шууд холбоотой тул үүнийг олон зуун хүн оролцсон нээлттэй сонсголоор бус, огт өөр бүрэлдэхүүн, агуулга, хэлбэрээр хаалттай хэлэлцэх нь манай улсын язгуур эрх ашигт илүү нийцнэ гэж үзэж буй. УИХ-ын зарим улстөрчид ямар арга хэмжээ хийх нь тэдний ухамсар, эрхийн асуудал. Тэр арга хэмжээнд нь очих эсэх нь иргэн миний ухамсар, эрхийн асуудал. Болгооно уу" гэжээ.
Сэтгэгдэл (13)