Монгол Улсын Их Хурлын 2024-2028 онд хэрэгжүүлэх стратеги төлөвлөгөөний хүрээнд шинэ үеийн парламентын хэрэгцээ, шаардлагад нийцсэн, өндөр бүтээмжит ажлын албыг бэхжүүлэхийн тулд Улсын Их Хурлын Тамгын газарт "Төслийн удирдлагын тогтолцоо"-г нэвтрүүлж эхэллээ. Энэ талаар Төслийн удирдлагын нэгжийн зөвлөх У.Хосжаргалаас тодрууллаа.

-Төслийн удирдлагын тогтолцоог бүрдүүлнэ гэлээ. Энэ талаар мэдээлэл өгнө үү?

-Манай улс анх удаа 126 гишүүнтэй шинэ парламентыг байгуулж, 2024 оны арваннэгдүгээр сард Улсын Их Хурал стратеги төлөвлөгөөгөө баталсан. Үндсэн 5 зорилгын хамгийн эхний зорилго нь төрийн үйлчилгээ иргэн төвтэй байх үзэл баримтлалыг тусгаж өгснөөрөө онцлог юм.

Дэлхийн олон улсууд төслийн удирдлагын арга зүйг төрийн байгууллагууд хэрэгжүүлдэг сайн туршлагуудыг судалж үзсэний үндсэн дээр Тамгын газрын үйл ажиллагааг сайжруулж, хууль санаачлах  үйл явцыг  олон улсын жишигт нийцүүлэхээр Улсын Их Хурлын дарга Д.Амарбаясгалангийн санаачлагаар  төслийн удирдлагын нэгжийг байгуулсан.
Төслийн удирдлага гэдэг нь ажлаа нарийн төлөвлөх тухай юм. Энэ ажлыг хийхэд хэн, ямар үүрэгтэйгээр оролцох, шаардагдах нөөц, тухайн төслөөс хүлээгдэж буй үр дүн нийгэм болон эдийн засагт хэрхэн нөлөөлөх гэдгийг  тооцоолж, одоогийн нөхцөл байдлаа сайтар судалж, тоо болон чанарын хэмжүүрээр хэмжиж өөрчлөлт хийх тухай юм. Хэмжиж чадахгүй бол сайжруулж чадахгүй.

-Үр дүнг нь хүртэл урьдчилж тооцоолно гэсэн үг үү?

-Төсөл бүхэн зорилготой байдаг. Юуг биелүүлэх, ямар зүйлийг авчрах, хэзээ эхлэх, хэзээ дуусах, ямар үр дүнгүүд гарсан байх вэ зэрэг нь тодорхой байх юм. 

Оролцогч тал буюу энэ хуулийн төслөөс ямар үр дүн гарах, хэн үр ашиг хүртэх вэ зэргийг маш тодорхой төлөвлөж, аль болох эрсдэл бага байхаар төслийн удирдлагыг хэрэгжүүлдэг. Ингэхдээ төслийн удирдлагын эцсийн үр дүн, нийгэмд үзүүлж байгаа нөлөөллийг анхнаас нь тусгаж, бүгдийг төлөвлөнө. Хэн яаж ажиллах, эхний зорилгоо хэзээ биелүүлэх вэ гэх мэт. Хууль санаачилж, УИХ-аар батлуулах нь бидний нэг зорилго байлаа гэхэд хэрэгжиж эхлээд нийгэмд зөв, сайн сайхан зүйлийг авчирч байгаа нь зорилгын биелэлт юм. УИХ-ын даргын захирамжаар байгуулагдсан зарим ажлын хэсгүүд үйл ажиллагаагаа илүү зохион байгуулалттай болгож, гол нь хүрэх үр дүнгээ хэмжигдэхүйц болгож байгаа нь төслийн менежментийн үр дүн юм.

-Энэ төслийн менежментийг хэрэгжүүлснээр бүтээмж дээшлэх үү?

-Тамгын газраас мэргэжлийн хүмүүстэй хамтран олон улсын стандартын дагуу бичиг баримтуудыг боловсруулж, төслийг хэрэгжүүлэх нөхцөлөө бүрдүүлснээс гадна эрх үүргүүдийг тодорхойлох журам гаргасан. Гурван сарын хугацаанд бэлтгэлээ хангасан. Хувийн хэвшил болон олон улсын байгууллагууд төслийн удирдлагын менежментийг нэвтрүүлээд 5-10 жил болж байна. Төрийн байгууллага дээр бид цогцоор нь, олон улсын стандартын дагуу нэвтрүүлэхээр ажиллаж байгаа юм. УИХ-ын гишүүдийн удирдаж байгаа 12 төслөөс ажлаа эхлүүлсэн. Тэдгээрийн нийгэмд үзүүлэх нөлөө, хуулийн хэрэгжилтэд хяналт тавьж байна. Тодруулбал, эрүүл мэнд, боловсролын салбар, нийгмийн ялгаварлан гадуурхалтын чиглэлээр ажлын хэсгүүд байгуулагдсан. Энэ төслүүд дээр бид төслийн удирдлагын менежментийн дэмжлэг үзүүлж, процессын үйл ажиллагаанд аль болох эрсдэлгүй, цаг тухайд нь чанартай дуусгахаар ажиллаж байна.