Монгол Улсын сайд, ЗГХЭГ-ын дарга Н.Учрал өнөөдөр Монгол Улс дахь Нэгдсэн Үндэстний Байгууллагын Суурин зохицуулагч Яап Ван Хиердэнийг Төрийн ордонд хүлээн авч уулзав.
Уулзалтаар Засгийн газрын үйл ажиллагааны хөтөлбөрт туссан төрийн албаны шинэчлэлийг эрчимжүүлэх, дэд бүтэц, бүтээн байгуулалтын 14 мега төслийг хэрэгжүүлэх чиглэлээр хамтран ажиллах боломжуудын талаар санал солилцов.
Тухайлбал, хилийн боомтуудын хил дамнасан холболтын төмөр зам, ачаа тээврийн шилжүүлэн ачих терминал, дулааны болон усан цахилгаан станц, Монгол-Францын Ураны төсөл, уул уурхайн салбарт томоохон цогцолборуудыг барьж байгуулах зэрэг томоохон төслүүдийн талаар мэдээлэл солилцож, хамтран ажиллах талаар санал ярилцав.
НҮБ-аас Монгол Улсад хэрэгжүүлж буй “Тогтвортой хөгжлийн хамтын ажиллагааны хүрээ 2023-2027” баримт бичиг нь Монгол Улсын урт хугацааны хөгжлийн бодлого “Алсын хараа 2050”, “Шинэ сэргэлтийн бодлого” болон салбарын бусад бодлого, төлөвлөгөөтэй уялдаж буй. Тиймээс Суурин зохицуулагчийн манлайлал дор уг баримт бичигт тусгагдсан тэргүүлэх чиглэлүүд болон өнгөрсөн хугацаанд харилцан тохиролцсон ажлуудыг амжилттай хэрэгжүүлж, тодорхой үр дүнд хүрнэ гэдэгт итгэлтэй буйгаа Н.Учрал сайд илэрхийлэв.
Манай улс 2026 онд уур амьсгалын өөрчлөлт, цөлжилт, газрын доройтолтой тэмцэх ажлын хүрээнд Цөлжилттэй тэмцэх тухай НҮБ-ын конвенцын Талуудын 17 дугаар бага хурал (COP17)-ыг Улаанбаатар хотноо зохион байгуулна. Энэ хүрээнд талууд идэвхтэй хамтран ажиллахаар тохиролцов.
