Ерөнхий сайд Л.Оюун-Эрдэнийн хүү О.Тэмүүлэнгийн найз охин Ө.Өгөөмөрийн инстаграм хаягийн сториноос энэ бүхэн эхэлсэн билээ. Улмаар хорь гаруйхан настай залуугийн тансаг амьдралын мөнгөний эх үүсвэр хаанаас болох нь хэний ч анхаарлыг татахаар байв. Тиймээс Ерөнхий сайдын хөрөнгө орлогын мэдүүлэгтэй харьцуулж үзэхэд брэндийн цүнх, машин, хувцас хэрэглэлийн хаана нь ч хүрэхээргүй байлаа. Ийнхүү иргэд Л.Оюун-Эрдэнийг орлогоо нотлохоос гадна огцрохыг шаардаж, "Огцрох амархан" жагсаалыг эхлүүлсэн нь долоо дахь өдөртэйгөө золгож байна. Өнөөдөр Ерөнхий сайдын хүү О.Тэмүүлэн Монгол Улсад ирж, тайлбар мэдүүлэг өгнө гэсэн мэдээллүүд хөвөрч байна.

Тэгвэл УИХ-ын болон Засгийн газрын зарим гишүүд Ерөнхий сайдыг огцрох эсэх асуудалд бус Засгийн газрын тогтвортой байдлын асуудалд ямар байр суурьтай байгааг хүргэж байна.

Шадар сайд Т.Доржханд: Улс төрд тогтворгүй байдал үүсгэх, хил холболтыг гацаах, цаад талд нь Монгол Улсын Засгийн газар тогтворгүй юм байна, сул юм байна, урт хугацаанд хамтарч ажиллаж чадахгүй юм байна, хөрөнгө оруулагчдыг үргээх, Засгийн газар хоорондын тохиролцоонуудыг зогсоох байдлыг хүлээн зөвшөөрөхгүй. Монгол Улсад хөрөнгө оруулалт хэрэгтэй байна. Хөрөнгө оруулалт байхгүй бол эдийн засгаа тэлэх ямар ч боломжгүй. Юу үнэн тэр үнэн. Тэр хүмүүс тогтвортой Засгийн газар, тогтвортой бодлогын хүсээд байгаа юм. Ийм болохоор ХҮН болон АН хамтарсан Засгийн газарт орсон.

35 жил бие биедээ дэгээ тавьсан хоёр намын тогтолцоогоор яваад үр дүнд нь унасан байна. Одоо бол түүхэн хариуцлагатай үе.

Нийлж нэгдээд томоохон асуудлын ард гаръя, популизмыг сөрье, хөрөнгө оруулалт нэмье, 10-20 жилийн хугацаанд найдвартай түнш байж чадна гэдгийг олон улсад харуулъя гэж нэгдсэн.

Зам тээврийн хөгжлийн сайд Б.Дэлгэрсайхан: Том эрх ашиг, улс орноо бодох ёстой. Төр засаг тогтворгүй бол манай улсын эдийн засаг, олон улсын харилцаа гээд олон зүйлд нөлөөлнө. 20, 30 жил гацсан мега төслүүд хөдөллөө шүү дээ.

Байгаа цаг үедээ том төслүүдээ хөдөлгөхгүй бол дэлхий биднийг хүлээхгүй. Цаг хугацааны хэмжүүр мөнгөнөөс үнэ цэнтэй болчихсон үед бид амьдарч байна. 

УИХ-ын гишүүн Б.Найдалаа: Засгийн газар огцрох эсэх нь тусдаа асуудал. Монгол Улс олон жил талцаад, жийлцээд, намчирхаад хамаг асуудлаа унагаад байгаа юм. Үүнийг засах ёстой. Ингэж байж хөгжих тухай, иргэдийн орлого өсөх тухай ярина л даа.

Хамтарч асуудлаа шийдээд урагшлах ёстой. Манай улсын Засгийн газрын дундаж нас 18 сар шүү дээ. Жил гаруйн хугацаа өнгөрөөд л Засгийн газраа унагадаг. Тэгээд бужигнадаг. Үүнийг болих хэрэгтэй. Тэгж байж бодлого тогтвортой байна. Байсхийгээд л Засгийн газар солигдоод байвал хэнээс, ямар хариуцлага нэхэх юм бэ. 

Тэргүүн Шадар сайд, ЭЗХ-ийн сайд Л.Гантөмөр: Эргэлт буцалтгүй чөлөөт эдийн засаг руу алхмаар байна.

Тийм сэтгэл зүрх Засгийн газарт байна. Бүгд зүтгэж байна. 

УИХ-ын гишүүн Ж.Баясгалан: Би бол хөгжлийн бэрхшээлтэй 114 мянган иргэний төлөөлөл. Би энд орж ирснээрээ асрах үйлчилгээний эрх зүйн орчныг сайжруулах, Хөгжлийн бэрхшээлтэй хүний эрхийн тухай хууль, Хүртээмжийн тухай хуулийн ажлын хэсгүүдэд орж ажиллаж байна. Энэ ажлууд маш сайн явж байна.

Төрийн ажил тогтвортой байгаасай л гэж хүсэж байна. Хамтарсан Засгийн газар бол дараагийн асуудал.